ទីបំផុតក្រុម West Brom បានចុះហត្ថលេខាយកខ្សែប្រយុទ្ធ KarlanGrant ពីក្រុម Huddersfield Town ក្នុងតម្លៃ១៥លានផោន។ កីឡាករWest Grant វ័យ២៣ឆ្នាំបានចុះកុងត្រារយៈពេល៦ ឆ្នាំជាមួយក្រុមនៅPremier League ។ កីឡាករអង់គ្លេសរូបនេះរកបាន១៩គ្រាប់ក្នុងការប្រកួតចំនួន ៤៣ប្រកួតសម្រាប់ក្រុម Huddersfield កាលពីរដូវកាលមុន។

លោក Luke Dowling នាយកបច្ចេកទេសកីឡារបស់ West Bromបាននិយាយថា “យើងបានតាមដានការវិវត្តរបស់ Karlan Grant អស់រយៈពេលជាយូរមកហើយ ហើយជាគោលដៅរបស់យើងតាំងពីមុនពេលទីផ្សារដោះដូរកីឡាករបើករដូវក្តៅ ។ យើងមានទំនុកចិត្តថាយើងបានចុះកុងត្រាជាមួយនឹងកីឡាករវ័យក្មេងម្នាក់ដែលបានបង្ហាញថា គាត់បានត្រៀមខ្លួនរួចជាស្រេចសម្រាប់ការប្រកួតនៅ Premier League ។

លោក Luke Dowling បានបន្តថា “ក្នុងឱកាសនេះយើងផ្តោតជាសំខាន់លើការនាំយកកីឡាករវ័យក្មេងដែលមានទេពកោសល្យដែលបានប្តេជ្ញាចិត្តជាមួយក្លិបដោយមានកិច្ចសន្យាវែងឆ្ងាយ ហើយ Karlan Grant គឺជាមនុស្សម្នាក់ដែលយើងពិតជារីករាយណាស់ដែលមានវត្តមាននៅទីនេះសម្រាប់អនាគតដែលអាចមើលឃើញនាពេលខាងមុខ ។

គួរបញ្ជាក់ថា កីឡាករ Karlan Grant បានចូលរួមជាមួយ Huddersfieldក្រោពីចេញពីក្រុម Charlton Athletic កាលពីខែមករា ឆ្នាំ២០១៩ ដោយរកបានគ្រាប់បាល់៤គ្រាប់ក្នុងក្របខ័ណ្ឌ Premier League ក្នុង១៣ប្រកួតខណៈដែលក្រុម Huddersfield ត្រូវបានកាត់ចេញពីលីកកំពូលអង់គ្លេសទៅលេងនៅលីកទី២។ កីឡាកររូបនេះ គឺជាការចុះហត្ថលេខាលើកទី៩ របស់ក្រុម West Brom នៃការផ្ទេរកីឡាករនៅពេលពួកគេដេញថ្លៃដើម្បីបន្តលេងនៅ Premier League ៕

  

ដោយ៖ភារៈ