ភ្នំពេញ៖ រយៈពេល៣ថ្ងៃនៃពិធីបុណ្យ ចូលឆ្នាំចិន និងវៀតណាមនៅតំបន់ រមណីយដ្ឋានប្រវត្ដិសាស្ដ្រខេត្ដសៀម រាបនិងតំបន់ឆ្នេរអូរឈើទាលខេត្ដ ព្រះសីហនុទទួលបានភ្ញៀវទេសចរជាតិ និងអន្ដរជាតិចូលទៅកម្សាន្ដប្រមាណ ជាង១០ម៉ឺននាក់ដោយពុំបានបូកបញ្ចូលតំបន់ទេសចរណ៍ផ្សេងៗទៀតនៅទូទាំង ទេសកម្ពុជាឡើយ ។
យោងតាមរបាយការណ៍របស់ក្រសួង ទេសចរណ៍ស្ដីពីកំណើនភ្ញៀវទេសចរ ជាតិនិងអន្ដរជាតិសម្រុកទៅកម្សាន្ដ តាមរមណីយដ្ឋានប្រវត្ដិសាស្ដ្ររយៈពេល៣ថ្ងៃនៃពិធីបុណ្យចូលឆ្នាំចិន និងវៀត ណាមបានកើនឡើងយ៉ាងខ្លាំងបើធៀប នឹងរយៈពេលដូចគ្នា ជាពិសេសខេត្ដ សៀមរាប (អង្គរវត្ដ) និងតំបន់ឆ្នេរ សមុទ្រខេត្ដព្រះសីហនុចាប់ពីថ្ងៃទី៧ដល់ថ្ងៃទី៩ ខែកុម្ភៈ ឆ្នាំ២០១៦កន្លងទៅ ។
គេហទំព័រផ្លូវការរបស់ក្រសួងទេសចរណ៍បានបង្ហាញឱ្យដឹងថា តួលេខភ្ញៀវ ទេសចរដែលចូលមកកម្សាន្ដខេត្ដសៀមរាបក្នុងឱកាសពិធីបុណ្យចូលឆ្នាំចិននិង វៀតណាមរយៈពេល៣ថ្ងៃទាំងភ្ញៀវទេសចរជាតិនិងអន្ដរជាតិសរុបមាន៧៥.៨៩០នាក់កើនឡើង៩,៧០ភាគរយ បើប្រៀប ធៀបនឹងឆ្នាំ២០១៥ ដែលតួលេខត្រឹម តែ៦៩.១៧៥នាក់ប៉ុណ្ណោះ ។ ក្នុងនោះភ្ញៀវ អន្ដរជាតិមាន២៧.៨៩០នាក់កើន២,៦៣ភាគរយបើប្រៀបធៀបឆ្នាំ២០១៥ (២៧.១៧៥នាក់) ។ ចំណែកឯភ្ញៀវទេស ចរជាតិមាន៤៨.០០០នាក់កើនឡើង ១៤្ប២៨ភាគរយបើប្រៀបធៀបជាមួយឆ្នាំ២០១៥រយៈពេលដូចគ្នាមានត្រឹមតែ៤២.០០០នាក់ប៉ុណ្ណោះ ។
គេហទំព័រដដែលបានបញ្ជាក់ថា តួលេខភ្ញៀវទេសចរដែលចូលទៅកម្សាន្ដនៅខេត្ដព្រះសីហនុរយៈពេល៣ថ្ងៃ ក្នុង ឱកាសបុណ្យចូលឆ្នាំចិន-វៀតណាម សរុបមានចំនួន៧៤.២២៣នាក់ បានកើន ឡើង១៧,៨៦ភាគរយ បើប្រៀបធៀបនឹង ឆ្នាំ២០១៥កន្លងទៅ ។ ក្នុងនោះតួលេខភ្ញៀវ ទេសចរជាតិមានចំនួន៦៦.៦៥៩នាក់ បានកើនឡើង១៨,៩១ភាគរយ រីឯតួលេខ ភ្ញៀវទេសចរអន្ដរជាតិមានចំនួន៧.៥៦៤នាក់កើនឡើង៩,០៧ភាគរយ ។
ទន្ទឹមនឹងកំណើនភ្ញៀវទេសចរជាតិ និងទេសចរបរទេសកើនឡើងដូចខាងលើនេះក្រសួងទេសចរណ៍បាននិងកំពុងយកចិត្ដទុកដាក់លើវិស័យអេកូទេសចរណ៍ ថែមទៀត ពីព្រោះវិស័យអេកូទេស ចរណ៍គឺជាគន្លឹះនៃការអភិវឌ្ឍប្រកប ដោយនិរន្ដរភាព (eco-tourism: the key to sustainable tourism) តួយ៉ាងដូចជា ខេត្ដមណ្ឌលគិរីក៏មានផែនការមេក្នុង ការអភិវឌ្ឍវិស័យទេសចរណ៍របស់ខ្លួន ដែរ ហើយក្រសួងទេសចរណ៍ក៏កំពុង រៀបចំច្បាប់ស្ដីពីអេកូទេសចរណ៍ផង ទៀត ។ ក្នុងនោះក្រសួងបានអំពាវនាវសូម ឱ្យថ្នាក់ក្រោមជាតិស្ថាប័នពាក់ព័ន្ធនិង ប្រជាពលរដ្ឋចូលរួមឱ្យបានគ្រប់ៗគ្នា ៕
ដោយ៖ សារីម
