ភ្នំពេញ ៖ បុរសអនាថាម្នាក់បានដេកស្លាប់នៅមុខផ្ទះប្រជាពលរដ្ឋ តាមបណ្ដោយផ្លូវលេខ២៧១ ក្នុងសង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ បង្កការភ្ញាក់ផ្អេីលដល់អ្នកដំណេីរនិងសមត្ថកិច្ច កាលពីវេលាម៉ោង១០យប់ ថ្ងៃទី២៨ ខែតុលា ឆ្នាំ២០២០ ។
សពជនរងគ្រោះមិនស្គាល់អត្តសញ្ញាណនោះទេ តែគេដឹងថាគាត់ជាមនុស្សមានសតិមិនសូវល្អ ឬជនអនាថា។
យោងតាមប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកេីតហេតុបានប្រាប់ឲ្យដឹងថា មុនពេលកេីតហេតុ៤ទៅ៥ថ្ងៃ គេសង្កេតឃេីញជនរងគ្រោះដេីរចុះឡេីងនៅម្ដុំកេីតហេតុនេះដោយស្លៀកសម្លៀកបំពាក់ចាស់ៗ ហេីយមានចរិតមិនសូវល្អ សង្ស័យជាជនអនាថាគ្មានទីពឹង។ ក្រោយមកក៏មិនឃេីញគាត់ដេីរឆ្លងកាត់ដូចសព្វដងឡើយ។ បន្ទាប់មកក៏មានប្រជាពលរដ្ឋធ្វេីដំណេីរឆ្លងកាត់កន្លែងកេីតហេតុបានធំុក្លិនស្អុយ ទេីបដឹងថាជនរងគ្រោះបានស្លាប់ទៅហេីយក៏រាយការណ៍ប្រាប់អាជ្ញាធរមូលដ្ឋាន និងសមត្ថកិច្ចឲ្យចុះមកពិនិត្យជាក់ស្ដែងតែម្ដង ។
ក្រោយពីសមត្ថកិច្ច និងអាជ្ញាធរមូលដ្ឋានទទួលបានដំណឹងនេះភ្លាម ក៏បានចុះមកដល់ហេីយទាក់ទងទៅជំនាញកោសល្យវិច័យឲ្យពិនិត្យបន្ថែមទេីបសន្និដ្ឋានថា ជនរងគ្រោះពិតជាស្លាប់ដោយសារខ្យល់គរ ឬគាំងបេះដូង ដោយខ្លួនឯង ពុំមានពាក់ព័ន្ធករណីអត្តឃាត ឬឃាតកម្មនោះទេ ។ បន្ទាប់មកក៏ធ្វេីឯកសារប្រគល់សពឲ្យទៅខាងរថយន្តសង្គ្រោះដឹកយកទៅតម្កល់នៅវត្តទឹកថ្លា ដេីម្បីបូជាតាមប្រពៃណី ៕ ដោយ ៖ ភារ៉ា ដង្កោ
