ខេត្តបន្ទាយមានជ័យ៖ នៅព្រឹកថ្ងៃទី៦ ខែតុលាឆ្នាំ២០២០នេះកម្លាំងការិយាល័យបង្ក្រាបបទល្មើសគ្រឿងញៀននៃទីបញ្ជាការកងរាជអាវុធហត្ថខេត្តបន្ទាយមានជ័យបានបញ្ជូនជនសង្ស័យ២នាក់ទៅសាលាដំបូងខេត្តដើម្បីចាត់ការតាមនិីតិវិធី ច្បាប់។
គួរបញ្ជាក់ថា ជនសង្ស័យម្នាក់ត្រូវបានកម្លាំងកងរាជអាវុធហត្ថក្រុងសិរីសោភ័ណឃាត់ខ្លួននៅចំណុចក្រោយខារ៉ាអូខេនាគមាសចាស់ ស្ថិតក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ នាវេលាម៉ោង២២ និង១០នាទី ថ្ងៃទី០៤ខែតុលាឆ្នាំ២០២០ ខណៈជនសង្ស័យកំពុងប្រើប្រាស់គ្រឿងញៀន។ ពេលនោះកម្លាំងបានធ្វើការឆែកឆេររកឃើញគ្រឿងញៀនមេតំហ្វេតាមីនទឹកកកចំនួន៣កូនថង់កិប ហើយកម្លាំងបានសួរនាំរហូតឈានដល់ការឃាត់ខ្លួនជនសង្ស័យម្នាក់ទៀត ព្រមទាំងដកហូតគ្រឿងញៀនបានចំនួន១កូនថង់បន្ថែមទៀត និងដកហូតម៉ូតូចំនួន២គ្រឿងផងដែរ។
ជនសង្ស័យទាំង២នាក់ម្នាក់ឈ្មោះ ប៉ាន់ សុភ័ក្ត្រ ភេទប្រុស អាយុ២០ឆ្នាំ មុខរបរកម្មករ បច្ចុប្បន្ន រស់នៅភូមិ២ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ និងម្នាក់ទៀតឈ្មោះ ផាលី ធីរ៉ូ ភេទប្រុស អាយុ២៥ឆ្នាំ មុខរបរកម្មករសំណង់ បច្ចុប្បន្នរស់នៅភូមិប្រឡាយហ្លួង ឃុំឫស្សីក្រោក ស្រុកមង្គលបុរី ខេត្តបន្ទាយមានជ័យ។ ជនសង្ស័យទាំង២នាក់នៅពេលសមត្ថកិច្ចសួរចម្លើយ បានឆ្លើយសារភាពថា ពួកគេពិតជាបានប្រើប្រាស់ និងជួញដូរនូវសារធាតុញៀនដោយខុសច្បាប់ប្រាកដមែន៕

ដោយ៖ ស សម