ភ្នំពេញ៖ បើយោងតាមប្រសាសន៍របស់សម្ដេចដោយផ្ទាល់ក្នុងសារអំពាវនាវរយៈពេល ២៣នាទីពីម្សិលមុិញ បានថ្លៃងថា៖ លោកឧបនាយករដ្ឋមន្ត្រី និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ អូន ព័ន្ធមុនីរ័ត្ន នឹងតំណាងសម្ដេចតេជោនាយករដ្ឋមន្ត្រី ហ៊ុន សែន សម្រាប់ប្រជុំអាស៊ាននៅពាក់កណ្ដាលខែវិច្ឆិកា ខាងមុខនេះ។
សូមជម្រាបជូនថា៖ សព្វដងនៅពេលដែលសម្ដេចតេជោ ហ៊ុន សែន នាយករដ្ឋមន្ត្រីមានកិច្ចការចាំបាច់ណាមួយ សម្រាប់កិច្ចការអន្តរជាតិ រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោកឧបនាយករដ្ឋមន្ត្រី ប្រាក់ សុខុន ជាតំណាងរបស់សម្តេច។ ជាក់ស្ដែងដូចជាកាលពីប្រជុំអាស៊ាន-កូរ៉េ និងមេគង្គ-កូរ៉េ កាលពីខែវិច្ឆិកា ឆ្នាំ២០១៩ លោក ប្រាក់ សុខុន ជាតំណាងដ៏ខ្ពង់ខ្ពស់របស់សម្ដេច។
តែពេលនេះគាប់ជួនដែលមន្ត្រីជាន់ខ្ពស់នៃក្រសួងការបរទេសខ្មែរជាច្រើនរូប រួមទាំងលោក ឧបនាយករដ្ឋមន្ត្រី និងរដ្ឋមន្ត្រី ប្រាក់ សុខុន ត្រូវធ្វើចត្តាឡីស័ករយៈពេល ១៤ថ្ងៃ ក្រោយពីមានការប៉ះពាល់ និងប្រាស្រ័យទាក់ទងជាមួយលោករដ្ឋមន្ត្រីការបរទេសហុងគ្រី ទើបសម្ដេចចាត់តាំងលោកឧបនាយករដ្ឋមន្ត្រីក្រសួងសេដ្ឋកិច្ចធ្វើជាតំណាងម្ដងឱ្យប្រមុខរដ្ឋាភិបាលកម្ពុជា។
សូមបញ្ជាក់ថា៖ នៅពាក់កណ្ដាលខែវិច្ឆិកានេះនឹងមានកិច្ចប្រជុំសំខាន់ៗក្នុងក្របខ័ណ្ឌអាស៊ានដូចជា កិច្ចប្រជុំកំពូលអាស៊ានលើកទី ៣៧ និងកិច្ចប្រជុំអាស៊ីបូព៌ា ព្រមទាំងប្រជុំដាច់ដោយឡែកផ្សេងទៀតដូចជា កិច្ចប្រជុំមេគង្គ-កូរ៉េ មេគង្គ-ជប៉ុន ព្រមទាំងប្រជុំសំខាន់ៗជាច្រើនទៀ។
សម្តេចមានប្រសាសន៍ថា៖ សូមឱ្យមន្ត្រី ថ្នាក់ដឹកនាំដែលបានធ្វើតេស្តកូវីដ-១៩ ត្រូវធ្វើចត្តាឡីស័ក អោយបាន១៤ថ្ងៃ ។ ហើយមិនឱ្យចេញហាត់ប្រាណ ចាប់ដៃ កាន់ដៃគ្នា ធ្វើឱ្យច្បាស់ពីចត្តាឡីស័ក និងរដ្ឋមន្ត្រីដែល មានមន្ត្រីរបស់ខ្លួនត្រូវធ្វើចត្តាឡីស័ក ដើម្បីការពារការឆ្លងដល់សហគមន៍៕
ដោយ៖ សិលា
