ខេត្តបន្ទាយមានជ័យៈ អំពើទុច្ចរិតរបស់ជនខិលខូច តែងបង្កើតនូវគំនិតបោកបញ្ឆោតកាន់តែមានវិធីនិងល្បិចកលប្លែកៗ អស់ពីត្រូវរង្វាន់ពីក្រុមហ៊ុន មានវិធីបោកថ្មីស្រឡាងមួយទៀត គឺជនល្មើសបានប្រើប្រាស់វិធីលក់ទឹកអប់ឲ្យក្រុមហ៊ុន ហើយអ្នកជាវនិងត្រូវរង្វាន់បានទូរស័ព្ទដៃទំនើបទៀតផង។
ហេតុការណ៍បែបនេះបានកើតមានឡើងការពីពេលថ្មីៗនៅក្នុងភូមិជនបទដាច់ស្រយាលមួយ ក្នុងស្រុកស្វាយចេក ខេត្តបន្ទាយមានជ័យ ហើយជនល្មើសក៏ត្រូវបានសមត្ថកិច្ចក្របួចមួយក្រុមមានប្រុសមានស្រី ខណៈពួកគេបានប្រើល្បិចបោកបញ្ឆោត ដោយការលក់ទឹកអប់មានរង្វាន់។ ក្នុងនោះគេបង្កើតឲ្យមានត្រូវរង្វាន់សម្រាប់អ្នកជាវទឹកអប់មួយដប គឺត្រូវទទួលបាន ទូរស័ព្ទដ៏ទំនើបចេញថ្មី ប៉ុន្តែទូរស័ព្ទនោះមានតម្លៃខ្ពស់ពួកគេជាអ្នកលក់ទឹកអប់តម្រូវឲ្យអ្នកត្រូវរង្វាន់ប្រគល់ប្រាក់ចំនួន ៤០០០បាតជាមុនសិន ដែលមានតម្លៃ១០០ដុល្លារ។
ក្រោយមកពេលប្រគល់រង្វាន់ជាទូរស័ព្ទម្នាក់ៗខកខ្លួនដឹងថា ចាញ់បោកក្រុមជនខិលខូចទាំងនេះពីព្រោះទូរស័ព្ទនោះជាប្រភេទផលិតនៅស្រុកចិន មានតម្លៃមិនដល់ ៣០ដុល្លារផង។
សកម្មភាព និងទង្វើចេតនាទុច្ចរិតដដែលៗរបស់ជានខិលខូច ចុងក្រោយក៏ត្រូវបានសមត្ថកិច្ចនគរបាលស្រុកស្វាយចេកធ្វើការឃាត់ខ្លួនក្នុងបទល្មើសជាក់ស្ដែងដើម្បីក៏សាងសំណុំរឿងតាមនិតិវិធីទៅសាលាដំបូង។
គួររំលឹកថា ល្បិចបោក តែងលេចចេញជារូបភាពប្លែកៗ ភាគច្រើនជនល្មើសច្បាប់បែបនេះ បានប្រព្រឹតតាមបណ្ដាខេត្ត ទីជនបទដាច់ស្រយាល ដែលជនល្មើសយល់ឃើញថា ប្រជាពលរដ្ឋខ្លះគាត់មិនបានទទួលព័ត៌មានអ្វីច្បាស់លាស់ពីល្បិចបោកប្រាស់ ទើបពួកគេឆ្លៀតឱកាស។ ដូច្នេះគាប់បីប្រជាពលរដ្ឋជ្រាបជាព័ត៌មាន ជុំវិញទង្វើទុច្ចរិតនេះ ពិសេសសមត្ថកិច្ចនិងអាជ្ញាធរមូលដ្ឋានត្រូវធ្វើការពន្យល់ឬចែករំលែកព័ត៌មានដ៏អាក្រក់របស់ជនបោកប្រាស់ឲ្យពលរដ្ឋក្នុងមូលដ្ឋានរបស់ខ្លួនបានដឹងផង៕
ដោយ៖ សុខ ខេមរា
