រាជធានីភ្នំពេញ ៖ កំលាំងសមត្ថកិច្ចនគរបាលខណ្ឌជ្រោយចង្វារឃាត់ខ្លួនជនសង្ស័យជួញដូរ និងប្រើប្រាស់គ្រឿងញៀន ២នាក់កាលពីវេលារំលងអធ្រាត្រឈានចូលថ្ងៃទី៣០ ខែមិថុនា ឆ្នាំ២០១៥ និងបានសហការជាមួយសមត្ថកិច្ចនគរបាលប៉ុស្តិ៍ស្រះចកបានឈានទៅឃាត់ខ្លួនបានជនសង្ស័យ ចំនួន៤នាក់ត្រូវបានជាបន្តបន្ទាប់ កាលពីពីរសៀលថ្ងៃទី៣០ មិថុនា ថ្ងៃដដែលនៅចំណុចផ្សេងគ្នា។
សមត្ថកិច្ចនគរបាលខណ្ឌជ្រោយចង្វារបានឲ្យដឹងថា ជនសង្ស័យទាំង៦នាក់ដែលឃាត់ខ្លួនបានជាបន្តបន្ទាប់មាន ១.ឈ្មោះផាន់ បឿន ភេទប្រុស អាយុ១៨ឆ្នាំ ជាកម្មករឡឥដ្ឋ ស្នាក់នៅភូមិចំបក់មាស សង្កាត់បាក់ខែង , ២-ឈ្មោះប៉ែន ឡោក ភេទប្រុស អាយុ២៤ឆ្នាំ កម្មករដូចគ្នា ស្នាក់នៅភូមិជាមួយគ្នា, ៣-ឈ្មោះសាន រាជ ហៅយុទ្ធ ភេទប្រុស អាយុ១៨ឆ្នាំ ស្នាក់នៅផ្ទះជួលខណ្ឌទួលគោក, ៤-ឈ្មោះហុង សុខេន អាយុ២០ឆ្នាំ ស្នាក់នៅសង្កាត់បឹងកក់, ៥-ឈ្មោះគង់ ទ្រី អាយុ២៩ឆ្នាំ ស្នាក់នៅសង្កាត់បឹងកក់២ និង៦-ឈ្មោះសូ សាមឌី ហៅបុកស័រ អាយុ៣២ឆ្នាំ មានទីលំនៅសង្កាត់ស្រះចក ខណ្ឌដូនពេញ (ជាមេខ្លោងជួញដូរគ្រឿងញៀន)។
បើតាមសម្តីរបស់ជនសង្ស័យបានប្រាប់សមត្ថកិច្ចនគរបាលឲ្យដឹងថា ពួកគេបានទិញថ្នាំញៀនពីចំណុចបឹងកក់ស្ថិតក្នុងសង្កាត់ស្រះចក ក្រោយពេលទទួលបានចំលើយសារភាពរបស់ជនសង្ស័យរួចហើយនោះ ទើបកំលាំងសមត្ថកិច្ចនគរបាលខណ្ឌជ្រោយចង្វារយើង នៅម៉ោងជាង៣រសៀល ថ្ងៃទី៣០ ខែមិថុនា ឆ្នាំ២០១៥ ថ្ងៃដដែលបានចុះទៅសហការជាមួយសមត្ថកិច្ចនគរបាលប៉ុស្តិ៍ស្រះចក ចុះទៅតាមផ្លូវរទេះភ្លើងឃាត់ខ្លួនបានជនសង្ស័យបាន ចំនួន៤នាក់ទៀត ព្រមទាំងដកហូតវត្ថុតាងមានគ្រឿងញៀនប្រភេទម៉ាទឹកកកសរុប១៥កញ្ចប់ ថង់សម្រាប់ច្រកគ្រឿងញៀន និងឧបករណ៍ប្រើប្រាស់មួយចំនួនទៀត។
ប្រភពពត៌មានពីសមត្ថកិច្ចនគរបាលខណ្ឌជ្រោយចង្វារបានឱ្យដឹងថា កាលពីម៉ោង១២:៣០នាទីរំលងអធ្រាត្រឈានចូលថ្ងៃទី៣០ មិថុនា កម្លាំងនគរបាលល្បាតខណ្ឌជ្រោយចង្វារបានឃាត់ខ្លួនជនសង្ស័យ២នាក់កំពុងជិះម៉ូតូមួយគ្រឿងម៉ាកសង់កូរ៉េតាមផ្លូវឆែកឆេររកឃើញថ្នាំញៀនម៉ាទឹកកក១កញ្ចប់ ហើយនាំទៅសាកសួរ ទើបឈានទៅឃាត់ខ្លួនបានបក្ខពួក និងមេខ្លោងជួញដូរគ្រឿងញៀនបាន៤នាក់ទៀត។
បច្ចុប្បន្នជនសង្ស័យទាំងអស់រួមនិងវត្ថុតាងទាំងអស់ត្រូវបានសមត្ថកិច្ចនគរបាលខណ្ឌជ្រោយចង្វារ កសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនិតិវិធី៕
