ភ្នំពេញ ៖ មន្ដ្រីនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញម្នាក់ត្រូវបានអ្នកកត់ឆ្នោតវៀតណាមចោទប្រកាន់ថា ចុះទៅឆាឆៅកន្លែងកត់ឆ្នោតរបស់ខ្លួន រួចបង្កជាទំនាស់រហូតឈានដល់ដកកាំភ្លើងខ្លីភ្ជង់គំរាមថែមទៀត តែត្រូវបានប្រជាពលរដ្ឋឃាត់ខ្លួន រួចប្រគល់ឲ្យនគរបាលប៉ុស្តិ៍រដ្ឋបាលពងទឹកយកទៅសួរនាំ ។
ហេតុការណ៍បង្កជាទំនាស់ឈានដល់ដកកាំភ្លេីងខ្លីភ្ជង់គំរាមខាងលេីនេះ គឺបានកេីតឡេីងកាលពីរសៀលថ្ងៃទី១៩ ខែវិច្ឆិកា ឆ្នាំ២០២០ នៅភូមិស្រែ.ញ សង្កាត់ពងទឹក ខណ្ឌដង្កោ រាជធានីភ្នំពេញ។
សមត្ថកិច្ចខណ្ឌដង្កោ បានប្រាប់ភ្នាក់ងារព័ត៌មានប្រចាំខណ្ឌដង្កោថា នគរបាលដែលឃាត់ខ្លួនឈ្មោះ ម៉ា ចាន់រិទ្ធី អាយុ៣៣ឆ្នាំ មានតួនាទីជានាយរងផ្នែកនៃការិយាល័យព្រហ្មទណ្ឌកម្រិតស្រាល រាជធានីភ្នំពេញ។
សមត្ថកិច្ចខណ្ឌដង្កោបានបញ្ចាក់ប្រាប់ថា នគរបាលដែលត្រូវឃាត់ខ្លួនខាងលេី ត្រូវបានប្រគល់ឲ្យទៅអង្គភាពរបស់ខ្លួនដោះស្រាយបន្ត ដោយសារស្ត្រីរងគ្រោះមិនបានប្តឹងផ្តល់ឡេីយ ដោយគ្រាន់តែឱ្យធ្វើកិច្ចសន្យាប៉ុណ្តោះ៕ដោយ៖ ភារ៉ា ដង្កោ
