អន្តរជាតិ៖ បើតាមការប្រកាសរបស់ក្រុមប្រឹក្សាសន្តិសុខសេតវិមាននៅថ្ងៃទី១៩ ខែវិច្ឆិកា ឆ្នាំ២០២០ ម្សិលមិញនេះ លោក Robert O’Brien ទីប្រឹក្សាសន្តិសុខជាតិអាមេរិក កំពុងធ្វើដំណើរដំណើរទស្សនកិច្ចទៅកាន់ប្រទេសតំបន់អាស៊ីអាគ្នេយ៍ចំនួនពីរ គឺវៀតណាម និងហ្វីលីពីន ក្នុងគោលដៅជជែកពីការពង្រឹងកិច្ចសហប្រតិបត្តិការសន្តិសុខទ្វេភាគី ប៉ុន្តែអ្វីដែរសំខាន់នោះក្ដីបារម្ភដូចគ្នាពាក់ព័ន្ធសកម្មភាពរបស់ចិន។
បើតាមក្រុមប្រឹក្សាសន្តិសុខជាតិនៃសេតវិមាន បានបញ្ជាក់សារនៅបណ្ដាញសង្គម Twitter យ៉ាងដូច្នេះថា លោក Robert O’Brien នឹងជួបជាមួយមេដឹកនាំប្រទេសដៃគូទាំងពីរ គឺវៀតណាម និងហ្វីលីពីន ដើម្បីបញ្ជាក់ពីភាពរឹងមាំទំនាក់ទំនងទ្វេភាគី និងពិភាក្សាកិច្ចសហប្រតិបត្តិការសន្តិសុខក្នុងតំបន់។
បើតាមការផ្សាយរបស់ទីភ្នាក់ងារព័ត៌មាន Reuters បាននិយាយថា មុនបន្តដំណើរទៅហ្វីលីពីន លោក O’Brien នឹងស្នាក់នៅវៀតណាមពីរថ្ងៃ នៅទីក្រុងហាណូយ ។ ដោយមន្ត្រីជាន់ខ្ពស់សន្តិសុខរូបនេះ នឹងជួបជាមួយនាយករដ្ឋមន្ត្រី ង្វៀន ស៊ួនហ្វុក និងមន្ត្រីទទួលបន្ទុកសន្តិសុខរបស់វៀតណាម ។ ហើយក្នុងដំណើរទស្សនកិច្ចរបស់លោក O’Brien កើតឡើងពីរសប្ដាហ៍ក្រោយទស្សនកិច្ចលោក ម៉ៃ ប៉ុមប៉េអូ រដ្ឋមន្ត្រីការបរទេស ដែលធ្វើឡើងចំពេលខួប២៥ឆ្នាំនៃការស្ដារទំនាក់ទំនងការទូត។
ទាក់ទងរឿងសិទ្ធិមនុស្សនេះ លោក O’Brien ក៏អាចយកបញ្ហានេះទៅតាមដែរក្នុងដំណើរទស្សនកិច្ចនៅហ្វីលីពីន។ ចំណែកទំនាក់ទំនងអាមេរិក និងវៀតណាម កាន់តែល្អប្រសើរនៅប៉ុន្មានឆ្នាំចុងក្រោយ ស្របពេលប្រទេសទាំងពីរមានត្រូវការគ្នាដើម្បីទប់ទល់ឥទ្ធិពលចិន បើទោះជាអាមេរិកបន្តរិះគន់ស្ថានភាពសិទ្ធិមនុស្សនៅវៀតណាមក្ដី។
ដោយឡែកទំនាក់ទំនងអាមេរិក និងហ្វីលីពីន បើទោះបីជាសម្ព័ន្ធមិត្តចាស់ឆ្នាំមែន ប៉ុន្តែមួយរយៈក្រោយនេះក៏ប្រែជាល្អក់កករក្នុងរដ្ឋបាលលោក រ៉ូឌ្រីហ្គោ ឌូទើតេ ដែលកាច់ចង្កូតហ្វីលីពីនខ្លាំងទៅរកចិន ដែលជាគូប្រជែងក្នុងសមុទ្រចិនខាងត្បូង។ ខណៈដែលអាមេរិក ក៏ធ្លាប់រិះគន់ទីក្រុងម៉ានីលរឿងសង្គ្រាមប្រឆាំងគ្រឿងញៀនដែលមានមនុស្សរាប់ពាន់នាក់បាត់បង់ជីវិតដែរ។
គួរបញ្ជាក់ថា ចំពោះការប្រឈមមុខជាមួយចិន តម្រូវឲ្យវៀតណាម និងអាមេរិកដែលជាអតីតគូសត្រូវក្នុងសង្គ្រាមវៀតណាម ក៏ដូចជាហ្វីលីពីន និងអាមេរិកដែលកំពុងមិនត្រូវគ្នា បែរមុខរកគ្នាវិញ។ ព្រោះជាកស្តែងហ្វីលីពីន និងវៀតណាម គឺសុទ្ធតែត្រូវការឥទ្ធិពលអាមេរិក ដើម្បីទប់ទល់អានុភាពរបស់ចិនក្នុងសំណុំរឿងសមុទ្រចិនខាងត្បូង៕ដោយ៖ស តារា
