ធ្លាប់ជាកីឡាករប្រដាល់សាកលល្បីបំផុតលើពិភពលោក Mike Tyson និង Roy Jones Jr នឹងឡើងសង្វៀនជាថ្មីនៅវេលាម៉ោង៩ ថ្ងៃទី២៩ខែវិច្ឆិកា (ម៉ោងនៅកម្ពុជា)។
កាលពីពាក់កណ្តាលឆ្នាំ២០២០ កីឡាករល្បីល្បាញលើពិភពលោក ទាំងរឿងល្អនិងអាក្រក់ Mike Tyson បានប្រកាលវិលត្រឡប់ឡើងសង្វៀនវិញដើម្បីប្រកួតជាមួយអតីតកីឡាករប្រដាល់ Roy Jones Jr ដែលមានវ័យជាង៥០ឆ្នាំដូចគ្នា។
ការសម្រេចឡើងសង្វៀនរបស់អតីតកីឡាករទាំងពីរទទួលបានការចាប់អារម្មណ៍យ៉ាងខ្លាំងពីអ្នកគាំទ្រ។ នេះជាលើកទីមួយក្នុងរយៈពេល១៥ឆ្នាំចូលនិវត្តន៍ កីឡាករទាំងពីរក៏សម្រេចឡើងសង្វៀនវិញ។
ការប្រកួតមានលក្ខណៈ សម្តែង(exhibition match) មានចំនួន៨ទឹក ដោយមួយទឹកៗមាន២នាទី។ ខុសពីការប្រកួតមុនពេលចូលនិវត្តន៍ កីឡាទាំងពីរត្រូវប្រើ ហ្គង់ការពារក្បាល ដោយសារតែកីឡាករមានវ័យចំណាស់អាចនឹងគ្រោះថ្នាក់ដល់អាយុជីវិតបើវាយចំក្បាលខ្លាំងនោះ។
តាមការលើកឡើងរបស់គណៈកម្មការរៀបចំការប្រកួតនៅរដ្ឋCalifornia បញ្ជាក់ថា ការឡើងសង្វៀនលើកនេះមានលក្ខណៈមិត្តភាព ដើម្បីដណ្តើមពាន WBC Frontline Battleផ្តល់ជូនដោយគណៈកម្មការកីឡាប្រដាល់ពិភពលោក។ ប៉ុន្តែកីឡាករទាំងពីរបានប្រកាសថា នឹងប្រដាល់ឱ្យអស់ពីសមត្ថភាព មិនបន្ធូរបន្ថយនោះឡើយ។
បច្ចុប្បន្ន កីឡាករ Mike Tyson មានអាយុ៥៤ឆ្នាំ ទម្ងន់ ១០៨,៨៦គីឡូក្រាម ធ្លាប់ប្រកួតឈ្នះ៥០លើក និងចាញ់៦លើក។
ចំណេកកីឡាករ Roy Jones Jr មានអាយុ៥១ឆ្នាំ ទម្ងន់៩០,៧២ គីឡូក្រាម ធ្លាប់ប្រកួតឈ្នះ៦៦លើកនិងចាញ់៩លើក៕
ដោយ៖ធី រីណា
