អន្តរជាតិ៖ បើយោងតាមសេចក្តីរាយការណ៍របស់អាជ្ញាធរសុខាភិបាលវៀតណាម នៅថ្ងៃទី៣០ ខែវិច្ឆិកា ឆ្នាំ២០២០ ប្រកាសថាមានករណីឆ្លងកូវីដ-១៩ ក្នុងស្រុកលើកដំបូង ក្រោយស្ងាប់ស្ងាត់អស់រយៈពេល ៨៧ថ្ងៃចុងក្រោយ នៅលើបុរសម្នាក់ដែលមានវ័យ៣២ឆ្នាំ និងជាគ្រូបង្រៀនភាសាអង់គ្លេស ត្រូវបានរកឃើញថា មានផ្ទុកកូរ៉ូណាវីរុស។ ខណៈបុរសរូបនេះ រស់នៅក្នុងទីក្រុងហូជីមិញ ហើយបានមានទំនាក់ទំនងជាមួយបុគ្គលិកបម្រើការលើយន្តហោះម្នាក់ ដែលត្រូវបានរកឃើញថា មានផ្ទុកកូវីដ-១៩ កាលពីប៉ុន្មានថ្ងៃមុន។
អាជ្ញាធរសុខាភិបាលវៀតណាម បន្តទៀតថា កន្លែងដែលគ្រូបង្រៀនភាសាអង់គ្លេសនេះ ធ្លាប់ទៅមានដូចជា៖ មជ្ឈមណ្ឌលបង្រៀនភាសាបរទេស ហាងកាហ្វេ បារ ខារ៉ាអូខេជាដើម ចាប់តាំងពីទាក់ទងជាមួយបុគ្គលិកបម្រើការលើយន្តហោះ ដែលជាមិត្តភក្តិរបស់ខ្លួន។ ដើម្បីទប់ស្កាត់ការរាតត្បាតនៅក្នុងទីក្រុង អាជ្ញាធរបានបញ្ជាឲ្យបិទកន្លែងដែលបុរសនោះធ្លាប់ទៅទាំងអស់រួចហើយ។
ទាក់ទិននឹងបញ្ហាខាងលើនេះ កន្លងមកអ្នកបម្រើការលើយន្តហោះ ត្រូវបានដាក់ចត្តាឡីស័កចំនួន ៥ថ្ងៃ និងធ្វើតេស្តរកកូរ៉ូណាវីរុសចំនួន ២លើក ដែលបង្ហាញថាអវិជ្ជមាន។ ក្រោយមក បុគ្គលិកបម្រើការលើយន្តហោះរូបនេះ បានស្នើមកដាក់ចត្តាឡីស័កនៅផ្ទះ ប៉ុន្តែក្រោយមក មានផ្ទុកវីរុសតែម្ដង។
សូមជម្រាបថា កន្លងទៅ ប្រទេសវៀតណាម បានដាក់ចេញចំណាត់ការជាច្រើន ដើម្បីទប់ស្កាត់កូវីដ-១៩។ គ្រាន់តែផ្ទុះកូវីដ-១៩ឡើង នៅក្នុងទីក្រុងដាណាង រដ្ឋាភិបាលទីក្រុងហាណូយ បានបញ្ជាឲ្យបិទក្រុង មធ្យោបាយដឹកជញ្ជូនសាធារណៈ កន្លែងកម្សាន្ត និងមុខជំនួញមួយចំនួនជាដើម។
គួរបញ្ជាក់ថា បើគិតមកត្រឹមថ្ងៃទី៣០ ខែវិច្ឆិកាម្សិលមិញនេះ ប្រទេសវៀតណាម មានករណីឆ្លងកូរ៉ូណាវីរុសសរុបចំនួន ១៣៤៧ករណី និងអ្នកស្លាប់មានចំនួន ៣៥នាក់។ ចំណែកអ្នកជាសះស្បើយវិញមានចំនួន ១១៧៩នាក់៕ដោយ៖ស តារា
