ភ្នំពេញ៖  អគ្គិភ័យបានឆេះតូបលក់បាយតូចមួយ ដោយសារតែម្ចាស់តូបបានបិទទ្វារត្រឡប់ទៅផ្ទះតែភ្លេចពន្លត់ចង្ក្រាន។

ហេតុការណ៍នេះបានបង្កភាពភ្ញាក់ផ្អើលកាលពីវេលាម៉ោង ៤និង ០០ នាទីរសៀលថ្ងៃទី ០១ ខែធ្នូឆ្នាំ ២០២០ ស្ថិតនៅតាមបណ្ដោយផ្លូវលេខ ៥២៨ ត្រង់ចំណុចតូបមួយកន្លែង ក្នុងសង្កាត់បឹងកក់ ០១ ខណ្ឌទួលគោក រាជធានីភ្នំពេញ។

តាមប្រភពព័ត៌មានពីម្ចាស់តូបបានលើកឡើងថា តូបរបស់ខ្លួនបានលក់បាយ និងភេសជ្ជៈផ្សេងៗទៀត បន្ទាប់ពីដល់ម៉ោងត្រូវបិទតូបដើម្បីត្រឡប់ទៅផ្ទះ រូបគាត់ក៏ភ្លេចពន្លត់ចង្ក្រានឃ្យូង រហូតបានរយៈពេលប្រហែលមួយម៉ោងជាង ក៏បង្កជាអគ្គីភ័យឆាបឆេះតូបរបស់ខ្លួនបែបនេះ។

ប្រភពដដែលពីស្ត្រីជាម្ចាស់ តូប បានប្រាប់ឲ្យដឹងថាគឺជាកំហុស របស់គាត់ ដែលចាកចេញពីតូប ខ្វះការប្រុងប្រយ័ត្នមិនបានមើលភ្លើង ចង្ក្រាន ភ្លើងធូប ភ្លើងទៀន ទើបបណ្ដាលឲ្យឆាប់ឆេះផ្អើលអស់គេឯង។

សូមបញ្ជាក់ កម្លាំងសមត្ថកិច្ចបានយករថយន្តពន្លត់អគ្គិភ័យចំនួនមួយគ្រឿងរបស់កងកម្លាំង ប៉េអឹម បានមកដល់ទីតាំងកើតហេតុ រួចធ្វើការអន្តរាគមន៏ រហូតអគ្គិភ័យរលត់ទៅវិញ នៅវេលាម៉ោង ៤ និង ២០ នាទីថ្ងៃខែឆ្នាំដដែល  ហើយនៅក្នុងករណីនេះគឺមិនបណ្ដាលឲ្យនរណាម្នាក់រងរបួសនោះទេ គ្រាន់តែខូចខាតសម្ភារៈនៅក្នុងតូប៕ ដោយ៖រ៉ារ៉ា