ខេត្តកណ្ដាល៖ យុវជនសង្ស័យម្នាក់បានយកម៉ូតូនិងគ្រឿងអលង្ការរបស់នារីជាសង្សាររបស់ខ្លួនទៅលក់អស់ ខណៈដែលនារីរងគ្រោះទុកគ្រឿងអលង្ការទាំងនោះក្នុងបន្ទប់ដេក ហើយនាងជាប់រវល់ងូតទឹកក្នុងបន្ទប់ទឹក ដោយពុំបានចាក់សោបន្ទប់នោះទេ។ ករណីនេះបានកើតឡើងកាលពីថ្ងៃទី១ ខែធ្នូ ឆ្នាំ២០២០ វេលាម៉ោង៦ៈ០០នាទិី នៅចំណុចបន្ទប់ជួលក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល។
មន្ត្រីនគរបាលក្រុងតាខ្មៅបានឲ្យដឹងថា ជនសង្ស័យឈ្មោះសួង សុផល ភេទប្រុស អាយុ៣៤ឆ្នាំ មានទីលំនៅភូមិស្វាយជួរ ឃំុកោះខែល ស្រុកស្អាង ខេត្តកណ្តាល មុខរបរមិនពិតប្រាកដ (ឃាត់ខ្លួន)។
ចំណែកជនរងគ្រោះឈ្មោះ នៅ ចន្នី ភេទស្រី អាយុ២៨ឆ្នាំ បច្ចុប្បន្នស្នាក់នៅបន្ទប់ជួលក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរ កម្មការិនី។
ចំពោះសម្ភារបាត់បង់មាន៖ ម៉ូតូម៉ាកHONDA ZOOMER-X ពណ៌ផ្កាឈូកលាយខ្មៅចំនួន១គ្រឿង, គ្រឿង
អលង្ការមួយចំនួនសរុបជាទឹកប្រាក់ប្រហែល២.៦១៣ដុល្លារអាមេរិក។
ប្រភពដដែលបន្តថា កន្លងមកជនសង្ស័យនិងនារីរងគ្រោះជាសង្សារនឹងគ្នា ហើយរស់នៅក្នុងបន្ទប់ជួលជាមួយគ្នាអស់រយៈពេល២ខែមកហើយ ដោយការរស់នៅមិនសូវចុះសម្រុងនឹងគ្នាទេ។ នារីរងគ្រោះក៏មានចិត្តចង់បែកពីសង្សារនេះដែរ ហើយនាងក៏បានឲ្យប្អូនស្រី២នាក់មកដេកជាមួយ ដើម្បីកុំឲ្យជនសង្ស័យជាសង្សារដេកក្នុងបន្ទប់។ លុះមកដល់ថ្ងៃកើតហេតុ នារីរងគ្រោះបានទុកម៉ូតូ និងគ្រឿងអលង្ការមួយចំនួនក្នុងបន្ទប់ដេក ហើយខ្លួនបានចូលក្នុងបន្ទប់ទឹកងូតទឹក ដោយពុំបានដាក់គន្លឹះទ្វារបន្ទប់ឡើយ។ ខណៈនោះជនសង្ស័យក៏បានចូលទៅក្នុងបន្ទប់រួចយកម៉ូតូនិងគ្រឿងអលង្ការទាំងនោះទៅលក់អស់ រហូតមកដល់ថ្ងៃទី០២ខែធ្នូ ឆ្នាំ២០២០វេលាម៉ោងប្រហែល២០និង០០នាទីជនរងគ្រោះបានទូរសព្ទ័ហៅជនសង្ស័យមកបន្ទប់ជួលរបស់ខ្លួនដើម្បីសួររឿងម៉ូតូនិងក្រដាសបញ្ចាំគ្រឿងអលង្ការ ស្រាប់តែជនសង្ស័យថាបានលក់ផ្តាច់អស់ហើយ។ក្រោយមកជនរងគ្រោះក៏បានទៅប្តឹងសមត្ថកិច្ចនៅអធិការដ្ឋាននគរបាលក្រុងតាខ្មៅដើម្បីឱ្យចាត់ការតាមនីតិវិធីច្បាប់៕ដោយ ស្អាងជ័យ
