ខេត្តកំពង់ឆ្នាំង៖ ក្នុងរយៈពេល៣ថ្ងៃកម្លាំងសមត្ថកិច្ចនគរបាលប្រឆាំងបទល្មើសគ្រឿងញៀនខេត្តកំពង់ឆ្នាំង បានធ្វើការឃាត់ខ្លួនជនសង្ស័យបានចំនួន៥នាក់ជាបន្តបន្ទាប់ ក្រោយពីក្រុមជនសង្ស័យទាំងនេះបានធ្វើសកម្មភាពជាបណ្តាញពីខេត្តកំពង់ឆ្នាំងរហូតដល់ភូមិសាស្រ្តខេត្តកណ្តាល ។
ក្នុងប្រតិបត្តិការបង្រ្កាបករណីគ្រឿងញៀននេះសមត្ថកិច្ចឃាត់ខ្លួនជនសង្ស័យបាន៥នាក់ខាងលើគឺធ្វើឡើងចាប់ពីថ្ងៃ៣០ ខែវិច្ឆិកា ឆ្នាំ២០២០ រហូតដល់ថ្ងៃទី២ ខែធ្នូ ឆ្នាំ២០២០ នៅក្នុងភូមិសាស្រ្តក្រុងកំពង់ឆ្នាំង ស្រុកកំពង់ត្រឡាច ខេត្តកំពង់ឆ្នាំង និងស្រុកពញាឮ ខេត្តកណ្តាលផងដែរ។
បើយោងតាមការបញ្ជាក់ពីលោកវរសេនីយ៍ឯកហ៊ុល វាសនា ស្នងការរងនគរបាលខេត្តកំពង់ឆ្នាំងបានឲ្យដឹងថា
ក្នុងប្រតិបត្តិការខាងលើនេះកម្លាំងសមត្ថកិច្ចយើងបានធ្វើការដកហូតនូវត្ថុតាងរួមមានថ្នាំញៀន៩កញ្ចប់ធំស្មើនឹង៦៦,៨៩ក្រាម, ម៉ូតូ១គ្រឿង, ទូរស័ព្ទ១គ្រឿង, ដាវ១និងឧបករណ៍សម្រាប់ជក់មួយចំនួនផងដែរ ។
បច្ចុប្បន្នជនសង្ស័យទាំង៥នាក់ខាងលើរួមនឹងវត្ថុតាងត្រូវបានកម្លាំងសមត្ថកិច្ចជំនាញកសាងសំណុំរឿងបញ្ជូនខ្លួនបន្តទៅកាន់តុលាការដើម្បីចាត់ការតាមនីតិវិធី ៕
ដោយ ស សម
