ក្រុម Borussia Dortmund ទទួលបានកៅអីឡើងទៅវគ្គ១៦ក្រុមចុងក្រោយនៃពានរង្វាន់ Champions League ទោះបីខកខានមិនបានរកគ្រាប់បាល់បញ្ចូលទីយកឈ្នះលើក្រុម Lazio ក៏ដោយ ក៏ក្រុមនេះបានប្រកួតស្មើគ្នា១ទល់១ ដែលធ្វើឲ្យក្រុម Dortmund នៅតែឈរលេខ១ក្នុងពូល F ។

នៅក្នុងការប្រកួតនោះមិនមានកីឡាករឆ្នើម Haaland ដែលជាអ្នករកគ្រាប់បាល់បញ្ចូលទីបានច្រើនជាងគេនៅក្នុងក្របខ័ណ្ឌ Champions League ជាមួយនឹងគ្រាប់បាល់ចំនួន ៦ គ្រាប់ដោយរូបគេបានអវត្តមានពីក្រុម ព្រោះមានបញ្ហារបួសសរសៃពួរ។

ក្រុម Dortmund បានរកគ្រាប់បាល់នាំមុខក្រុម Lazio នៅតង់ទី១ នាទីទី៤៤ ដោយកីឡាករខ្សែបម្រើស្លាប Raphael Guerreiro ជាអ្នកស៊ុតចូលប៉ុន្តែនៅនាទីទី៦៧ ក្នុងតង់ទី២ ក្រុមLazio បានបាល់ប៉េណាល់ទី១គ្រាប់ដែលជាការស៊ុតបាល់ពិន័យដោយកីឡាករ Ciro Immobile ធ្វើឱ្យ Lazio តាមស្មើ១ទល់១រហូតចប់ការប្រកួត។

បច្ចុប្បន្នក្រុម Dortmund កំពុងឈរលេខ១ក្នុងពូល F មាន១០ពិន្ទុ ខណៈដែលក្រុម Lazio ឈរលេខ២មាន៩ពិន្ទុ ដែលត្រូវប៉ះក្រុម Club Bruges ដែលបានផ្តួលក្រុម Zenit St Petersburg ៣-០ នៅថ្ងៃទី៩ ធ្នូខាងមុខ។ ចំណែកក្រុម Dortmund ត្រូវប៉ះក្រុម Zenit St Petersburg ដើម្បីធានាកៅអីកាន់តែច្បាស់នៅថ្ងៃទី៩ ធ្នូដូចគ្នា ៕ដោយ៖ភារៈ