ខេត្តកំពង់ស្ពឺ៖ យុវជនម្នាក់ បានបើកម៉ូតូ មកលោតទឹកសម្លាប់ខ្លួននៅស្ទឹងព្រែកត្នោតបង្កឱ្យមានការភ្ញាក់ផ្អើលកាលពីរសៀលថ្ងៃទី៥ ខែធ្នូ ឆ្នាំ២០២០នៅ
ត្រង់ចំណុចភូមិទួលគក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។
យុវជនម្នាក់នេះត្រូវបានគេស្គាល់ ឈ្មោះ ស៊ីម ផានិត អាយុ ១៧ ឆ្នាំ រស់នៅភូមិព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ។មុនពេលកើតហេតុយុវជននេះ បានបើកម៉ូតូ ម៉ាកហុងដា សេ១២៥ ស៊េរី២០២០ ពណ៌ខ្មៅ ពាក់ស្លាកលេខកំពង់ស្ពឺ 1P4909 បើកបរពីទិសខាងជើង ទៅខាងត្បូង ។លុះបើកមកដល់ ពាក់កណ្តាលស្ពាន ស្រាប់តែយុវជនខាងលើ បានចតម៉ូតូ ចោលលើស្ពានហើយរត់ទៅលោតទឹកស្ទឹង សម្លាប់ខ្លួនតែម្តង ។
ភ្លាមនោះ ដោយមានការយកចិត្តទុកដាក់ ពីសមត្ថកិច្ចក្រុងច្បារមន បានចាត់កម្លាំងចុះជួយសង្គ្រោះយុវជនខាងលើ ដែលលោតទឹកសម្លាប់ខ្លួននេះ បានទាន់ពេលវេលាហើយស្រង់មកលើគោកចៀសផុតពីសេចក្តីស្លាប់។
ក្រោយពីសង្គ្រោះយុវជននេះបានហើយ សមត្ថកិច្ច បានយកទៅសាកសួរនៅអធិការដ្ឋាននគរបាលក្រុងច្បារមន និងហៅក្រុមគ្រួសារ ឲ្យមកទទួលយុវជននេះ ទៅអប់រំវិញ ខណ:យុវជនរូបនេះអះអាងថាគេធ្វើបែបនេះព្រោះមានវិបត្តិក្នុងគ្រួសារ៕
ដោយ÷ប្រាថ្នា
