ភ្នំពេញ៖ នៅព្រឹកថ្ងៃចន្ទទី៧ ខែធ្នូ ឆ្នាំ២០២០នេះ មន្ត្រីរាជការក្រសួងមហាផ្ទៃ ត្រូវទៅធ្វើតេស្តយកសំណាកលើកទី២ នៅទីស្តីការក្រសួងមហាផ្ទៃ ដោយបានតម្រង់ជួរ ដើម្បីចូលធ្វើតេស្តម្តងម្នាក់ៗ។ ហើយនេះជាលើកទី២ ដែលមន្ត្រីរាជការ សរុប ១៥៤៤នាក់ ដែលបានធ្វើតេស្ត យកសំណាកលើកទី១ ពាក់ព័ន្ធព្រឹត្តិការណ៍សហគមន៍២៨វិច្ឆិកា ។
បើតាមក្រសួងសុខាភិបាល នៅព្រឹកថ្ងៃចន្ទ ទី៧ ខែធ្នូនេះ បានប្រកាសថា គិតពីថ្ងៃទី២៩ ខែវិច្ឆិកា ដល់ថ្ងៃទី៦ ខែធ្នូ ឆ្នាំ២០២០ ក្រសួងសុខាភិបាល បានធ្វើតេស្តអ្នកប៉ះពាល់ព្រឹត្តិការណ៍សហគមន៍២៨វិច្ឆិកា សរុបទាំងអស់ បានចំនួន ១១៣០៥ នាក់ ដែលនៅក្នុងចំនួននេះ មានអ្នកវិជ្ជមានវីរុសកូវីដ១៩ថ្មី សរុបចំនួន ៣២នាក់ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត និងនៅមណ្ឌលសុខភាពចាក់អង្រែ។
ជាក់ស្តែងកាលពីថ្ងៃទី៦ ខែធ្នូម្សិលមិញនេះ ក្រសួងសុខាភិបាល ទើបរកឃើញមន្ត្រីរាជការនៅក្រសួងមហាផ្ទៃម្នាក់ទៀត បានឆ្លងជំងឺកូវីដ១៩ថ្មី ជាស្ត្រីជនជាតិខ្មែរ ឈ្មោះ ជី ពេជ្រឆារ៉ា អាយុ ២៩ឆ្នាំ មានអាសយដ្ឋានស្នាក់នៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ ខណៈដែលស្ត្រីរូបនេះ បានចូលក្នុងហាង Zando បឹងកេងកង នៅថ្ងៃទី២៧ ខែវិច្ឆិកា ឆ្នាំ២០២០ នៅម៉ោង ២០ និង៣០ នាទីយប់ ( ដោយមិនបានការពារត្រឹមត្រូវ )។
ដោយឡែកអ្នកពាក់ព័ន្ធព្រឹត្តិការណ៍សហគមន៍២៨វិច្ឆិកាផ្សេងទៀត នឹងត្រូវធ្វើតេស្ត លើកទី២ នៅព្រឹកថ្ងៃទី៨ ខែធ្នូ ឆ្នាំ២០២០ នៅ ៥ ទីកន្លែង ដែលក្រសួងសុខាភិបាល បានកំណត់ រួមមាន៖ ១-ផ្ទះសម្តេច ហេង សំរិន ២-ផ្ទះសម្តេចក្រឡាហោម ស ខេង ៣-រដ្ឋសភា ៤-ទីតាំងអង្គភាពភីឡត បន្ទាយទួលក្រសាំង សម្រាប់ក្រុមភីឡត និងក្រុមអង្គរក្សសម្តេចតេជោ និង៥-ពហុកីឡដ្ឋានជាតិអូឡាំពិក ( សម្រាប់ប្រជាពលរដ្ឋ ដែលបានប៉ះពាល់ផ្ទាល់ និងប្រយោល )៕ដោយ៖ស តារា
