រដ្ឋមន្ត្រីការពារជាតិរុស្ស៊ីលោក Sergei Shoigu នៅពេលថ្មីៗនេះបានប្រកាសឲ្យដឹងថា កម្លាំងទាហានប្រទេសនេះនឹងរក្សាការហ្វឹកហាត់ធ្វើសង្គ្រាមនៅឆ្នាំ២០២១ ដែលបានរក្សាដូចដើមគឺមានសមយុទ្ធជាង៤៨០០លើកដូចការគ្រោងទុក។
រដ្ឋមន្ត្រីការពារជាតិរុស្ស៊ីSergei Shoigu បានប្រកាសក្នុងសន្និសីទកាសែតកាលពីថ្ងៃទី៦ខែធ្នូថា «ការហ្វឹកហាត់ថ្មីត្រូវបានឡើងគម្រោង ហើយឆ្នាំ២០២១យើងរក្សាការហ្វឹកហាត់ដូចដើម ដោយមានសកម្មភាពធ្វើសមយុទ្ធតូចធំ៤៨០០លើក»។
លោកSergei Shoigu បន្តទៀតថា«យើងផ្តោតសំខាន់ទៅលើការបណ្តុះបណ្តាលហ្វឹកហាត់ បង្កើនសមត្ថភាពធ្វើសង្គ្រាមរបស់កម្លាំងទាហានទាំងអស់» ។ លោក Sergei Shoigu បន្តទៀតថាក្នុងចំណោមសកម្មភាពធ្វើសមយុទ្ធជាង៤៨០០លើក ក្នុងនោះមាន១២០០លើកធ្វើឡើងនៅក្នុងទីតាំងយោធា និង១៧០០លើកធ្វើឡើងនៅខាងក្រៅ។
រដ្ឋមន្ត្រីការពារជាតិរុស្ស៊ីបញ្ជាក់ទៀតថា មានសម្ភារយោធាចំនួន២៥០០ នឹងត្រូវបានប្រើប្រាស់ក្នុងសកម្មភាពធ្វើសមយុទ្ធបាញ់គ្រាប់ពិត។
ចាប់តាំងពីប្រធានាធិបតីពូទីនឡើងកាន់អំណាច លោកបានចេញបញ្ជាឲ្យកម្លាំងទាហានធ្វើសមយុទ្ធជាទ្រង់ទ្រាយធំជាបន្តបន្ទាប់ ហើយសមយុទ្ធមិនមានការព្រាងទុកជាមុនឡើយ ដើម្បីពង្រឹងស្មារតីត្រៀមធ្វើសង្គ្រាមជានិច្ច៕
