អន្តរជាតិ៖ បន្ទាប់ពីក្រុមការងារអង្គការសហប្រជាជាតិ កំពុងបំពេញការងារនៅអេត្យូពី ដើម្បីជួយដល់ជនស៊ីវិល និងជនភៀសខ្លួនក្រោយការប្រយុទ្ធគ្នារវាងរដ្ឋាភិបាល និងក្រុមបះបោរនៅតំបន់Tigray ស្រាប់តែនៅថ្ងៃទី៨ ខែធ្នូ ម្សិលមិញនេះ រដ្ឋាភិបាលអេត្យូពី បានអះអាងថាកងទ័ពរបស់ខ្លួនបានបាញ់គំរាម និងឃាត់ខ្លួនក្រុមការងារអង្គការសហប្រជាជាតិ កាលពីថ្ងៃទី៦ធ្នូថ្មីៗនេះ បន្ទាប់ពីឡានពួកគេមិនព្រមឈប់នៅកន្លែងត្រួតពិនិត្យចំនួន២។
ចំពោះការប្រយុទ្ធគ្នាតាំងតែពីថ្ងៃទី៤ វិច្ឆិកាមកម្ល៉េះ បើគិតទៅជាងមួយខែនេះ រដ្ឋាភិបាលអេត្យូពី និងក្រុមបះបោរនៅតំបន់ Tigray បានប្រយុទ្ធគ្នាបណ្តាលមនុស្ស៩សែន៥ម៉ឺននាក់ភៀសខ្លួន ដែលក្នុងនោះមាន៥សែននាក់កំពុងស្ថិតនៅក្នុងទឹកដីអេរីត្រេក្បែរខាង។
អ្នកនាំពាក្យរដ្ឋាភិបាលអេត្យូពី លោក Redwan Hussein បានអះអាងថា ឡានក្រុមការងារអង្គការសហប្រជាជាតិ មិនព្រមឈប់នៅកន្លែងត្រួតពិនិត្យចំនួនពីរ និងបើកយ៉ាងតក់ក្រហល់ទៅកាន់តំបន់ហាមឃាត់។ លោកបន្តថា នៅពេលរថយន្តនោះប្រុងនឹងបើកហួសកន្លែងត្រួតពិនិត្យទី៣ កងកម្លាំងរដ្ឋាភិបាលអេត្យូពី បានបាញ់គំរាម និងឃាត់ខ្លួនបុគ្គលិកទាំងនោះ។
បើយោងតាមទីភ្នាក់ងារព័ត៌មាន Reuters បានចុះផ្សាយថា ជុំវិញករណីខាងលើនេះ អ្នកនាំពាក្យអង្គការសហប្រជាជាតិលោក Stephane Dujarric បានលើកឡើងថា ក្រុមការងារដែលមានមនុស្សចំនួន៤នាក់ កំពុងស្វែងរកផ្លូវដើម្បីចូលរកទៅកាន់ជំរំជនភៀសខ្លួននៅក្នុងប្រទេសអេរីត្រេ ដែលជាប់តំបន់ Tigray ហើយពួកគេកំពុងត្រួតពិនិត្យផ្លូវក្នុងតំបន់ដែលត្រូវផ្តល់ជំនួយ។
ដោយឡែកអង្គការសហប្រជាជាតិ ខណៈស្ថានភាពជនភៀសខ្លួនយ៉ាប់យ៉ឺន ក៏បានស្វែងរកផ្លូវដែលមានសុវត្ថិភាព ក្នុងការផ្តល់ជំនួយនៅក្នុងតំបន់ Tigray ដែលមានប្រជាជនជាង៥លាននាក់រស់នៅ ក្នុងនោះមាន៦សែននាក់ រស់អាស្រ័យនឹងជំនួយ តាំងតែពីមុនការប្រយុទ្ធគ្នាមកម្ល៉េះ។ កងទ័ពរដ្ឋាភិបាលអេត្យូពី អះអាងថា ខ្លួនបានទទួនជ័យជម្នះលើក្រុមបះបោរ និងគ្រប់គ្រងទីក្រុង Mekelle ដែលជាទីក្រុងធំជាងគេរបស់Tigray ។
ចំណែករដ្ឋាភិបាលអេត្យូពី ចំពោះរឿងជំនួយនេះ ក៏បានលើកឡើងថា ខ្លួនបានចុះកិច្ចសន្យាជាមួយអង្គការសហប្រជាជាតិ ដោយសង្ឃឹមថាស្ថាប័ននេះ នឹងសម្របសម្រួលក្នុងការផ្តល់ជំនួយ តែរដ្ឋាភិបាលអេត្បូពី នឹងចាត់ចែងការងារដោយខ្លួន។ លោក Redwan លើកឡើងថា អេត្យូពី មានសមត្ថភាពក្នុងការមើលថែប្រជាជានរបស់ខ្លួនហើយ។
គួរបញ្ជាក់ដែរថា បើតាមរដ្ឋាភិបាលអេត្យូពី ជំនួយ បានទៅកាន់តំបន់ដែលខ្លួនកាន់កាប់រួចហើយ ប៉ុន្តែទីភ្នាក់ងារជំនួយអន្តរជាតិនិយាយថាការចូលទៅក្នុងតំបន់ Tigray មានសភាពកាន់តែលំបាកឡើងជាលំដាប់។ ជាក់ស្តែងអង្គការជនភៀសខ្លួនន័រវេស អះអាងថា ត្រូវរង់ចាំជាច្រើនសប្តាហ៍ ដើម្បីទទួលបានភ្លើងខៀវ ក្នុងការផ្តល់ស្បៀង ជម្រក និងសម្ភារសំខាន់ៗ៕ដោយ៖ស តារា
