ភ្នំពេញ៖ រហូតមកដល់ថ្ងៃព្រឹកថ្ងៃទី១៩ខែកុម្ភៈឆ្នាំ២០១៦ម្សិលមិញ ព្រឹត្តិការណ៍រត់ប្រណាំងពាក់កណ្តាលម៉ារ៉ាតុង ដើម្បី ការពារបរិស្ថានតំបន់ឆ្នេរ អប់អរសាទរ ទិវាសិទ្ធិនារី ៨មិនា និងស្វែងរកមូលនិធិមនុស្សធម៌ត្រូវបានគណៈកម្មាធិការជាតិអូឡាំពិកកម្ពុជា សហការជាមួយក្រុម ហ៊ុន Cambodian Events Organizer និងឧបត្ថម្ភធំដោយក្រុមហ៊ុន សាបៀរអង្គរបង្ហាញពីតួលេខអ្នករត់ទាំង៣ប្រភេទវិញ្ញាសាប្រមាណ១,៣០០នាក់នេះបើតាមប្រសាសន៍លើកឡើងរបស់លោក វ៉ាត់ ចំរើន អគ្គលេខាធិការNOCC។
លោកបានបញ្ជាក់ថា គិតមកដល់ត្រឹមថ្ងៃទី១៩ខែកុម្ភៈឆ្នាំ២០១៦នេះ យើងទទួលបាន អ្នកចុះឈ្មោះ សរុប១,៣០០នាក់ ខណៈដែលព្រឹត្តិការណ៍មួយនេះ កាលពីឆ្នាំ២០១៥អាចទាក់ទាញអ្នកចូលរួមប្រមាណ១,២០០នាក់តួលេខនេះបានបង្ហាញឲ្យឃើញថា មិនមានការថបថយនោះ ហើយក៏បានកើនឡើងដែរ។
លោកអគ្គលេខាធិការ បានបញ្ជាក់ថា ចំពោះព្រឹត្តិការណ៍រត់ពាក់កណ្តាលម៉ារ៉ាតុងនៅខេត្តព្រះសីហនុ សូមស្នើដល់ក្រុមអាជីវករ ម្ចាស់ផ្ទះសំណាក់ សណ្ឋាគារ មេតាកុំឡើងថ្លៃ ដើម្បីបង្កលក្ខណៈងាយស្រួលដល់ភ្ញៀវទេសចរជាតិនិងអន្តរជាតិ ដែលមានបំណងទៅចូលរួមរត់នៅខេត្តតំបន់ឆ្នររបស់យើង។
លោកបានបញ្ជាក់បន្ថែមថា មហាជននានាដែលមានបំណងចុះឈ្មោះចូលរួមប្រកួតក្នុងព្រឹត្តិការណ៍ពាក់កណ្តាលម៉ារ៉ាតុងខេត្តព្រះសីហនុ អាចចុះឈ្មោះបានតែ១ទីតាំងប៉ុណ្ណោះ គឺការិយាល័យផ្ទះលេខ៧៩C ផ្លូវ១៥៥ កែងផ្លូវ៤៧៦ សង្កាត់ទួលទំពូងទី១ ខណ្ឌចំការមន រាជធានីភ្នំពេញ ឬទំនាក់ទំនងតាមរយៈទូរស័ព្ទលេខ០២៣ ២១៣ ៥២៥។ រីឯវិញ្ញាសារត់ពាក់កណ្តាលម៉ារ៉ាតុងចម្ងាយ២១គីឡូម៉ែត្របុរស-នារី, ១០គីឡូម៉ែត្របុរស-នារី និងរត់កម្សាន្តលក្ខណៈគ្រួសារ ចម្ងាយ៣គីឡូម៉ែត្រមិនប្រកាន់វ័យ។
ទន្ទឹមនិងការលើកឡើងរបស់ លោកវ៉ាត់ ចំរើន អគ្គលេខាធិការ NOCC លោក សែម ផល្លាហ៊ុន Cambodian Events Organizer និងជាសមាជិក គណៈកម្មការរៀបចំការប្រកួតព្រឹត្តិការណ៍រត់ប្រណាំងពាក់កណ្តាលម៉ារ៉ាតុង នៅខេត្តព្រះសីហនុ បានធ្វើការអំពាវនាវ ដល់សាធារណជន នៅទូទាំងខេត្តព្រះសីហនុ ដូចជាយុវជន សិស្សានុសិស្ស ភ្ញៀវទេសចរជាតិនិងអន្តរជាតិ ដែលមានបំណងចូលរួមក្នុងព្រឹត្តិការណ៍រត់ប្រណាំងដើម្បីមូលនិធិមនុស្សធម៌ ដើម្បីអប់អរសាទរ ទិវាបុណ្យសិទ្ធិនារី៨មិនា និងរត់ដើម្បីការពារបរិស្ថានធម្មជាតិ តំបន់ឆ្នេរអូឈើទាលឲ្យបានច្រើនកុះករ។
លោកបានបន្តទៀតថា ឆ្នាំ២០១៦នេះ គណៈកម្មការគ្រោងធ្វើនាព្រឹកថ្ងៃអាទិត្យ ទី៦ ខែមិនា ឆ្នាំ២០១៦ ខាងមុខដូច្នេះមហាជនគ្រប់មជ្ឈដ្ឋាន ដែលមានបំណងចង់ចូលរួមរត់ប្រណាំងនេះសូមមកចុះឈ្មោះឲ្យបានគ្រប់គ្នានិងច្រើនកុះករជាងបណ្តាឆ្នាំមុនៗ ទៀតពីព្រោះព្រឹត្តិការណ៍រត់ប្រណាំងសប្បុរសធម៌ និងការពារបរិស្ថាននៅតំបន់ឆ្នេរអូរឈើទាលមួយនេះអាចជោគជ័យទៅលុះត្រាតែមានការចូលរួមមហាជនគ្រប់មជ្ឈដ្ឋាន ៕
ដោយ៖ សារីម
