ខេត្តស្វាយរៀង៖ មេភូមិធ្លក សង្កាត់ សង្ឃ័រ ក្រុងស្វាយរៀង លោកមាស យ៉ាំ បានរងការរិះគន់ពីប្រជា ពលរដ្ឋក្នុងភូមិថា បានលួចយកដីប្រជាពលរដ្ឋជាង២ហិកតា ទៅអង្កន់ចែកចាយឲ្យបក្ខពួកជា មន្រី្តថ្នាក់លើរបស់ខ្លួនប្រមាណ៤-៥ នាក់ ជាថ្នូរនឹងតំណែងធ្វើប្រធានភូមិយូរអង្វែង ហើយករណីនេះធ្វើឲ្យប្រជាពលរដ្ឋក្នុងភូមិជាសាក្សីនាំគ្នាទៅតវ៉ាដល់ដីស្រែនេះនាព្រឹកថ្ងៃទី១៩ ខែកុម្ភៈឆ្នាំ២០១៦នេះ ។
លោកយាយ មាស ដាន់ អាយុ៧៧ឆ្នាំ ជាកសិករ រស់នៅភូមិសង្កាត់ ខាងលើ បានឲ្យដឹងថា ដីទំហំជាង២ហិកតានេះ(ដីតារាងបាល់)ជាដីកម្មសិទ្ធិរបស់គាត់ ព្រោះក្រោយថ្ងៃរំដោះ ៧ មករាឆ្នាំ១៩៧៩ នៅទីនេះបានបន្សល់ទុកដុំថ្ម ព្រៃឈើដុះស៊ុបទ្រុបក្នុងសម័យសង្គ្រាម និង សម័យប៉ុល ពត មកម្ល៉េះ ។ ចាប់ពីពេលនោះមកដោយឃើញដីនេះនៅទំនេរ ទើបប្តីរបស់គាត់ និងកូនៗបាននាំគ្នាទៅគាស់ រុក រានយកដុំថ្ម ឬសឈើចេញ ដោយចំណាយពេលជិតមួយឆ្នាំ ឲ្យក្លាយជាដីស្រែ និងនាំគ្នាបង្កបង្កើនផលជារៀងរហូតមក ។
លោកយាយបន្តថា រហូតមកដល់ឆ្នាំ១៩៩៦ ខាងមន្ទីរឧស្សាហកម្មខេត្ត បានមកសុំដីនេះធ្វើជាកន្លែង ពិសោធន៍និងផលិតជីមួយរយៈ សម្រាប់បម្រើសេចក្តីត្រូវការរបស់ប្រជាពលរដ្ឋ ហើយ ក្រុមគ្រួសារលោកយាយក៏សម្រេចឲ្យទៅ ។ លុះបានជាងមួយឆ្នាំក្រោយមក មន្ទីរឧស្សាហកម្មខេត្ត បានបញ្ចប់ការងារនេះ ក៏ស្នើឲ្យក្រុមគ្រួសារលោកយាយធ្វើលិខិតជាលាយលក្ខណ៍អក្សរសុំយកដីនេះមកបង្កបង្កើនផលវិញ ។ ចាប់ពីពេលនោះមក ប្តីរបស់លោកយាយ កាន់តែចាស់ជរា រីឯកូនៗក៏មានគ្រួសារទៅរស់នៅខេត្តឆ្ងាយៗ មិនអាចបង្កបង្កើនផលលើ ដីស្រែជាង២ហិកតានេះបានក៏ទុកឲ្យដីនៅទំនេរ រហូតដល់ប្តីស្លាប់ទៀត ។ លុះក្រោយមកមិន ដឹងរឿងអីស្រាប់តែ លោក មាស យ៉ាំ ជាប្រធានភូមិបានឃុបឃិតជាមួយថ្នាក់លើរបស់ខ្លួន អង្កន់ដីនេះចែកគ្នាយកធ្វើជាកម្មសិទ្ធិរៀងៗខ្លួនទៅវិញ ។
មន្រី្តសុរិយោដីមួយរូបសុំមិនបញ្ចេញឈ្មោះបានលួចបង្ហើបឲ្យដឹងថា ដីនេះក្លាយជាកម្ម សិទ្ធិរបស់បុគ្គលមនុស្ស៤-៥នាក់រួចទៅហើយក្នុងនោះមានកូនលោកក្រុមប្រឹក្សាខេត្តមួយចំណែក លោកស្នងការងខេត្តស្វាយរៀងម្នាក់មួយចំណែក និងលោកមាស យ៉ាំ ជាប្រធានភូមិមួយផ្នែក ។ ពួកគេបានធ្វើឯកសារយកដីនេះក្នុងអំឡុងឆ្នាំ២០០២ មកម្ល៉េះ គឺក្នុងអំឡុងលោក ហ៊ុន ណេង ធ្វើជាអភិបាលខេត្តស្វាយរៀងមកម្ល៉េះ ។
ទាក់ទិនករណីនេះលោកចៅសង្កាត់សង្ឃ័រ បានបញ្ជាក់ថា លោកមិនពាក់ព័ន្ធនឹងរឿងធ្វើឯកសារយកដីរបស់លោកយាយមាស ដាន់ នេះទេ តែអាចមានទាក់ទងលោកមេឃុំមុន ឯលោកទើបធ្វើចៅសង្កាត់ក្រោយទេ ។
រីឯលោក មាស យ៉ាំ ជាមេភូមិធ្លក នគរវត្តបានទំនាក់ទំនងបកស្រាយបញ្ហានេះ បែរជា ឆ្លើយថា យាយ មាស ដាន់ មិនអាចធ្វើឈ្នះគេទេ ព្រោះឯកសារគេមានបោះត្រាធំៗ ណាស់ និងសុទ្ធតែអ្នកធំទៀត ។
ដោយឡែកលោកយាយ មាស ដាន់ វិញបានមានប្រសាសន៍ថា គាត់មិនឲ្យដីដែលក្រុម គ្រួសារគាត់ខំបង្ហូរញើសឈាមពីដំបូងក្លាយជាកម្មសិទ្ធិបុគ្គលទាំងអស់នេះដាច់ខាត សុខចិត្ត ប្រគល់ដីនេះជូនរដ្ឋធ្វើសាលារៀន ឬ មន្ទីរពេទ្យបម្រើផលប្រយោជន៍សាធារណៈវិញ ៕
ដោយ៖ ប្រាថ្នា
