ខេត្តសៀមរាប៖ កាលពីរសៀលថ្ងៃទី១៥ខែធ្នូ ឆ្នំា២០២០កម្លាំងកងរាជអាវុធហត្ថខេត្តសៀមរាប បានកសាងសំណុំរឿងបញ្ជូនជនសង្ស័យម្នាក់ទៅសាលាដំបូងខេត្តក្រោយធ្វើសកម្មភាពវាយប្លន់យកម៉ូតូពីជនរងគ្រោះម្នាក់នៅខេត្តសៀមរាបរួចជិះគេចខ្លួនទៅខេត្តបាត់ដំបង។
មន្រ្តីកងរាជអាវុធហត្ថខេត្តសៀមរាបបានឲ្យដឹងថា ជនសង្ស័យដែលឃាត់ខ្លួនឈ្មោះ ហុន វិជាតិ ភេទប្រុសអាយុ៤៣ឆ្នាំ គ្មានមុខរបរ ទីលំនៅបច្ចុប្បន្ន ភូមិបឹងដូបប៉ា សង្កាត់ស្លក្រាម ក្រុងសៀមរាប ខេត្តសៀមរាប។ ជនសង្ស័យត្រូវឃាត់ខ្លួនបាននៅចំណុច ភូមិដូង ឃុំបឹងរាំង ស្រុកកំរៀង ខេត្តបាត់ដំបង ក្នុងខណៈពេលដែលជនសង្ស័យខាង លើ ជិះម៉ូតូដែលវ៉ៃយកបានពីជនរងគ្រោះ ពីខេត្ត សៀមរាប ហើយគេចខ្លួនមកដល់ស្រុកកំរៀង។ ចំណែកជនរងគ្រោះ សមត្ថកិច្ចពុំបង្ហាញឈ្មោះនោះទេ។
ប្រភពដដែលបានឲ្យដឹងទៀតថា ជនសង្ស័យបានវ៉ៃជនរងគ្រោះយកម៉ូតូ កាលពីវេលាម៉ោង ២និង៣០ នាទីរសៀល ថ្ងៃទី១៣ ខែធ្នូ ឆ្នាំ២០២០ នៅចំណុច ភូមិអញ្ចាញ សង្កាត់នគរធំ ក្រុងសៀមរាប ខេត្តសៀមរាប ។ ក្រោយពីទទួលពាក្យបណ្តឹង កម្លាំងជំនាញការិយាល័យព្រហ្មទណ្ឌ ចុះស្រាវជ្រាវស៊ើប អង្កេតបទល្មើសជាក់ស្តែង ។ លុះនៅវេលាម៉ោង ១និង៣០ នាទីរសៀល ថ្ងៃទី១៤ ខែធ្នូ ឆ្នាំ២០២០ កម្លាំងការិយាល័យព្រហ្មទណ្ឌដឹកនាំដោយលោក អនុសេនីយ៍ទោ សៀក សោភា នាយការិយាល័យព្រហ្មទណ្ឌ បានធ្វើការសហការជាមួយកម្លាំងជំនាញ មូលដ្ឋានកងរាជអាវុធហត្ថស្រុកកំរៀង ខេត្តបាត់ដំបង ឃាត់ខ្លួនជនសង្ស័យតែម្តង។ ជាមួយនេះក៏រឹបអូសវត្ថុតាងរួមមាន ម៉ូតូ ១គ្រឿង ម៉ាកហុងដាឌ្រីម សេ១២៥ ស៊េរីឆ្នាំ២០០៧ ពណ៌ខ្មៅ លេខតួ+លេខម៉ាស៊ីន ៨១៩៦៨៧៦ ពាក់ស្លាកលេខ សៀមរាប ១B-៨៧៧៧ ជាម៉ូតូដែលជនសង្ស័យវ៉ៃយកពីជនរងគ្រោះ។
ក្នុងពេលសាកសួរ ជនសង្ស័យនេះបានសារភាពថា ខ្លួនពិតជាបានវ៉ៃជនរងគ្រោះយកម៉ូតូពិតប្រាកដមែន ទើបសមត្ថកិច្ចរៀបចំសំណុំរឿងបញ្ជូនទៅសាលាដំបូងខេត្តសៀមរាបចសត់ការតាមច្បាប់៕ដោយ ៖ប្រាថ្នា
