ខ្សែប្រយុទ្ធ Robert Lewandowski របស់ក្រុម Bayern Munich បានឈ្នះកីឡាករបុរសឆ្នើមក្នុងពានរង្វាន់បាល់ទាត់ Fifa Football Awards ក្នុងទីក្រុង Zurich ដោយបានយកឈ្នះកីឡាករ Lionel Messi និង Cristiano Ronaldo របស់កីឡាករឆ្នើមកាលពីឆ្នាំទៅ។ នេះបើយាមការចុះផ្សាយរបស់ BBC Sport នៅព្រឹកថ្ងៃទី១៨ ខែធ្នូ ឆ្នាំ២០២០នេះ។

ខ្សែប្រយុទ្ធប៉ូឡូញរូបនេះរកបាន៥៥គ្រាប់ក្នុង៤៧ប្រកួតកាលពីរដូវកាលមុន ខណៈដែលរូបគេបានជួយក្លិបយក្សរបស់អាល្លឺម៉ង់ Bayern Munich ឈានទៅរកភាពអស្ចារ្យឈ្នះពានលីគកំពូលអាល្លឺម៉ង់ និង Champions League ។

Lewandowski មានវ័យ៣២ឆ្នាំបានបញ្ចប់ក្នុងនាមជាអ្នករកគ្រាប់បាល់បានច្រើនជាងគេក្នុងលីកអាល្លឺម៉ង់ និង Champions League ។ ខ្សែការពារ Lucy Bronze របស់ក្រុម Manchester City បានឈ្នះពានរង្វាន់កីឡាការិនីឆ្នើមប្រចាំឆ្នាំផងដែរ។

អ្នកឈ្នះត្រូវបានសំរេចដោយការតែងតាំងពីប្រធានក្រុមជម្រើសជាតិ និងគ្រូបង្វឹកដែលជាសន្លឹកឆ្នោតរបស់អ្នកគាំទ្រ និងអ្នកតំណាងសារព័ត៌មានចំនួន២០០នាក់។

នេះជាលើកទី១ហើយដែល Lewandowski បានឈ្នះពានរង្វាន់នេះដោយខ្សែប្រយុទ្ធឆ្នើម Messi របស់ក្រុម Barcelona ឬ Ronaldo របស់ក្រុមសេះបង្កង់ Juventus តែងតែទទួលបានពានរង្វាន់នេះច្រើនជាងគេ។

រដូវកាលនេះ Lewandowski បានរកគ្រាប់បាល់បញ្ចូលទីចំនួន១៦គ្រាប់ក្នុង១៤ប្រកួតសម្រាប់ក្រុម Bayern Muninch ។ Lewandowski បាននិយាយថា “ប្រសិនបើអ្នកឈ្នះពានរង្វាន់បែបនេះហើយចែករំលែករង្វាន់នោះជាមួយ Messi និង Ronaldo នោះពិតជាមិនគួរឱ្យជឿទេ ហើយវាពិតជាមានន័យណាស់សម្រាប់ខ្ញុំ។ ជាយូរមកហើយខ្ញុំចាំថាខ្ញុំចង់បានអ្វីមួយ ដូចនេះហើយឥឡូវនេះខ្ញុំអាចឈ្នះនិងរង្វាន់បែបនេះ។ នេះពិតជាមានន័យណាស់មិនថាអ្នកមកទីណាក៏ដោយអ្វីដែលសំខាន់គឺជាអ្វីដែលអ្នកបានខិតខំប្រឹងប្រែង”។

កីឡាការិនី Lucy Bronze គឺជាអ្នកទទួលបានពានរង្វាន់ស្ត្រីឆ្នើមរបស់ FIFA បន្ទាប់ពីបានបញ្ចប់ជាមួយក្រុម Lyon ហើយវិលត្រឡប់ទៅប្រទេសអង់គ្លេសដើម្បីលេងឱ្យក្រុម Manchester City វិញនៅរដូវកាលនេះ។

បច្ចុប្បន្នគ្រូបង្វឹកក្រុមជម្រើសជាតិហូឡង់លោកស្រី Sarina Wiegman ត្រូវបានតែងតាំងជាគ្រូបង្វឹកស្ត្រីឆ្នើមរបស់ FIFA ជាលើកទី២ ក្នុងអាជីពរបស់គាត់បន្ទាប់ពីទទួលបានជោគជ័យនៅឆ្នាំ២០១៧។ ជាមួយគ្នានេះដែរលោក JurgenKlopp ទទួលបានពានរង្វាន់គ្រូបង្វឹកឆ្នើមផ្នែកបុរសរបស់ FIFA សម្រាប់២ឆ្នាំជាប់ៗគ្នាដោយបានដឹកនាំក្រុមហង្សក្រហមឈ្នះជើងឯក Premier League ជាលើកដំបូងក្នុងរយៈពេល៣០ឆ្នាំ។

Manuel Neuer ត្រូវបានជ្រើសរើសជាអ្នកចាំទីបុរសឆ្នើមរបស់ FIFA ខណៈដែល Sarah Bouhaddi បានឈ្នះពានរង្វាន់អ្នកចាំទីស្ត្រីឆ្នើមរបស់ FIFA ដែរ ។

តាមការចុះផ្សាយរបស់ BBC Sport ដដែលបានបង្ហាញថា កីឡាករល្អបំផុត១១នាក់ប្រចាំឆ្នាំរបស់ Fifa ត្រូវបានគេដាក់ឲ្យអ្នកចាំទី Alisson, ខ្សែការពារមាន Trent Alexander-Arnold, Virgil Van Dijk, ThiagoAlcantara និងកីឡាករ Davies ខណៈខ្សែបម្រើមាន Kevin De Bruyneរបស់ក្រុម Manchester City, Tiago និង Kimmich។ ចំណែកខ្សែប្រយុទ្ធ៣រូបមាន Lewandowski, Messi និង Ronaldo ៕

  

ដោយ៖ភារៈ