ភ្នំពេញ៖ បើយោងតាមលិខិតអញ្ជើញដែល អង្គភាព នគរដ្រេហ្គន ទទួលនៅព្រឹកថ្ងៃទី១៩ ខែធ្នូ ឆ្នាំ២០២០នេះ ពិធីប្រកាសចូលកាន់តំណែងអភិបាលថ្មី នៃខេត្តប៉ៃលិន នឹងត្រូវធ្វើឡើងនៅថ្ងៃទី២១ ខែធ្នូ ឆ្នាំ២០២០ ក្រោមអធិបតីភាព សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ។
សូមបញ្ជាក់ថា, ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រនៃកម្ពុជា បានចេញព្រះរាជក្រឹត្យ២ ដាច់ដោយឡែកពីគ្នា ដោយតែងតាំង លោកស្រី បាន ស្រីមុំ អតីតតំណាងរាស្រ្តមណ្ឌលប៉ៃលិន ជាអភិបាលខេត្តប៉ៃលិន ជំនួស លោក ផាន់ ចាន់ធុល ដែលត្រូវបានដំឡើងជា អនុរដ្ឋលេខាធិការ នៃក្រសួងមហាផ្ទៃ។
ព្រះរាជក្រឹត្យតែងតាំងអ្នកទាំងពីរនេះ បានធ្វើឡើងតាមសំណើទូលថ្វាយរបស់ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា។
លោក ផាន់ ចាន់ធុល បានឡើងកាន់តំណែងជាអភិបាលខេត្តប៉ៃលិន ជំនួស លោក កើត សុធា ដែលដាក់ឱ្យចូលនិវត្តន៍ កាលពីខែមេសា ឆ្នាំ២០១៨។ ដោយឡែក លោកស្រី បាន ស្រីមុំ ក៏បានជាប់ជាតំណាងរាស្រ្ត២អាណត្តិជាប់គ្នា នៅមណ្ឌលប៉ៃលិន ចាប់តាំងពីឆ្នាំ២០១៣មក។
សូមជម្រាបជូនផងដែរថា, លោកស្រី បានស្រីមុំ ដែលត្រូវចូលកាន់តំណែង ជាអភិបាល នៃគណៈអភិបាលខេត្តប៉ៃលិន នៅថ្ងៃទី២១ ខែធ្នូ ឆ្នាំ២០២០ ខាងមុខនេះ បានក្លាយជាស្ត្រីទី២ មានតួនាទីជាអភិបាលខេត្ត បន្ទាប់ស្ត្រីទីមួយ លោកស្រី មិថុនា ភូថង ជាអភិបាលខេត្តកោះកុង ក្នុងជួររាជរដ្ឋាភិបាល សម្ដេចតេជោ ហ៊ុន សែន៕ដោយ៖សិលា
