កាលពីថ្ងៃទី១៩ ខែកុម្ភៈ ឆ្នាំ២០១៦ នាយករដ្ឋមន្ត្រីប្រទេសនេប៉ាល់ លោក Sharma Oli បានអញ្ជើញទៅដល់ទីក្រុងញូវដេលី ក្នុងដំណើរទស្សនកិច្ចរយៈពេល៦ថ្ងៃទៅកាន់ប្រទេសឥណ្ឌា ។ នេះជាដំណើរទស្សនកិច្ចទៅក្រៅប្រទេសដំបូងគេបំផុតសម្រាប់លោកនាយករដ្ឋមន្ត្រីនេប៉ាល់ បន្ទាប់ពីចូលកាន់តំណែងកាលពីខែតុលា ឆ្នាំ២០១៥កន្លងមក ។
លោក Sharma Oli ជានាយករដ្ឋមន្ត្រីនេប៉ាល់ដំបូងគេបំផុតដែលធ្វើទស្សនកិច្ចនៅក្នុងប្រទេសឥណ្ឌា បន្ទាប់ពីអតីតនាយករដ្ឋមន្ត្រី Baburam Bhattarai ដែលធ្លាប់បានបំពេញទស្សនកិច្ចនៅឥណ្ឌាក្នុងឆ្នាំ២០១១ ។ កាលពីឆ្នាំ២០១៤ នាយករដ្ឋមន្ត្រីនេប៉ាល់ចុងក្រោយគីលោក Sushil Koirala បានមកកាន់ប្រទេសឥណ្ឌាដើម្បីចូលរួមពិធីស្បថចូលកាន់តំណែងរបស់នាយករដ្ឋមន្ត្រីណារ៉េនដ្រា មូឌី ផងដែរ ។
លោក Vikas Swarup អ្នកនាំពាក្យរបស់ក្រសួងកិច្ចការផ្ទៃក្នុងរបស់ឥណ្ឌាបានថ្លែងថា អំឡុងពេលដំណើរទស្សនកិច្ចរបស់នាយករដ្ឋមន្ត្រីនេប៉ាល់មកកាន់ឥណ្ឌានាពេលនេះ ភាគីទាំងពីរនឹងពិភាក្សាគ្នារាល់បញ្ហាទាំងឡាយដែលផ្តល់អត្ថប្រយោជន៍គ្នាទៅវិញទៅមក ។ កិច្ចសហប្រតិបត្តិការជាឧភតោភាគី ការទំនាក់ទំនងរវាងប្រជាជន នឹងប្រជាជន ព្រមទាំងពិភាក្សាផ្តោតទៅលើវិស័យទេសចរណ៍ផងដែរ ។
ទំនាក់ទំនងមិត្តភាពរវាងឥណ្ឌា នឹងនេប៉ាល់មួយរយៈពេលកន្លងទៅថ្មីៗនេះមានការរង្គោះរង្គើរ ដោយសារតែរដ្ឋធម្មនុញ្ញដែលតាក់តែងឡើងថ្មីរបស់នេប៉ាល់ធ្វើឲ្យទីក្រុងញូវដេលីមានការមិនពេញចិត្ត ។ ឥណ្ឌាបានរិះគន់របបនេប៉ាល់មុនថា ការតាក់តែងរដ្ឋធម្មនុញ្ញថ្មីនោះមិនបានផ្តល់សិទ្ធិគ្រប់គ្រាន់ដល់ក្រុមជនជាតិដើមភាគចិននោះឡើយ។
ទីក្រុង Kathmandu បន្ទាប់មកបានព្យួរការចេញរដ្ឋធម្មនុញ្ញថ្មី ក្រោយបាតុកម្មប្រឆាំងតវ៉ាយ៉ាងខ្លាំងពីសំណាក់ប្រជាពលរដ្ឋ រហូតឈានដល់ការបិតផ្លូវតាមច្រកនេប៉ាល់-ឥណ្ឌាពីសំណាក់ជនជាតិដើមភាគតិច Madhesi ក៏ដោយសារតែកង្វះខាតទំនិញគ្រឿងឧបភោគបរិភោគ និងប្រេងសម្រាប់ប្រើប្រាស់ជាដើម ៕
