ទីតាំងយោធាPendletonស្ថិតនៅរដ្ឋ កាលីហ្វ័រនីញ៉ាអាមេរិក រងការឆាបឆេះ នៅព្រឹកថ្ងៃទី២៤ខែធ្នូ(ពេលវេលាអាមេរិក)បង្ខំឲ្យជម្លៀសពលរដ្ឋនៅក្នុងតំបន់ទៅកាន់ទីតាំងមានសុវត្ថិភាព ក្រោយការឆាបឆេះរាលដាលខ្លាំង។
ភ្លើងឆេះព្រៃមានឈ្មោះថា”Creek Fire” បានឆាបឆេះ នៅយប់ថ្ងៃទី២៣ខែធ្នូ (ពេលវេលាអាមេរិក) នៅតាមជើងភ្នំភាគខាងកើត នៃទីតាំងយោធា Pendleton ។ អណ្តាតភ្លើងរាលដាលយ៉ាងឆាប់រហ័ស ដោយបំផ្លាញព្រៃឈើជាង១ពាន់ហិកតាក្នុងរយៈពេលខ្លី។
មកទល់ពេលនេះ មិនទាន់មានរបាយការណ៍ស្តីពីការស្លាប់ ឬរងរបួសក្នុងហេតុការណ៍នោះនៅឡើយទេ ប៉ុន្តែមានមនុស្សជាង ៧.០០០នាក់បានជម្លៀសចេញពីជំរុំយោធាPendleton ដែលជាទីតាំងទាហានជើងទឹកវាយឡើងគោក។
តាមសារព័ត៌មានFOX 5 San Diego ពលរដ្ឋរស់នៅតំបន់ Fallbrook មានចម្ងាយពីជំរុំយោធាខាងលើ ដល់ទៅ១១គីឡូម៉ែត្រក៏ត្រូវជម្លៀសផងដែរ។ បច្ចុប្បន្ន ភ្លើងឆេះបានគ្រប់គ្រង៣៥ភាគរយហើយ ហើយក្រុមពន្លត់បានខិតខំទប់ស្កាត់ការឆ្លងរាលដាលជាថ្មី៕ដោយ៖ធី រីណា
