ភ្នំពេញ៖ សម្តេចតេជោ ហ៊ុន សែន បានមានប្រសាសន៍ក្នុងFacebookថា ការចែកទ្រព្យសម្បតិ្តជាមាស ប្រាក់ ជាចលនទ្រព្យ ឬជាអចលនទ្រព្យ ជារឿងមួយហើយប្រសិនយើងមានតែការចែកតម្រិះវិជា្ជសំខាន់ ជាងចែកទ្រព្យសម្បតិ្តទៅទៀត។
លុយកាក់អាចចាយវាយអស់ អាចភ្លើងឆេះឬបាត់បង់។ល។ តែតម្រិះវិជ្ជាមិនអាចមានអ្នកណាលួចប្លន់ឬបំផ្លាញបានឡើយ។ មាតាបិតា ឬអាណាព្យាបាលមិនថាមាន ឬក្រនៅទីក្រុង ឬជនបទត្រូវខិតខំជំរុញកូនចៅឱ្យរៀនសូត្រ។ រឿងដែលគួរឱ្យកត់សំគាល់នៅពេលនេះគឺ ឪពុកជាមន្ត្រីប្រឆាំងគ្រឿងញៀន តែកូនខ្លួនឯងបែរជាជក់គ្រឿងញៀន ឪពុកជានគរបាលចរាចរណ៍ តែកូនខ្លួនឯងរំលោភច្បាប់ចរាចរណ៍។ល។ហើយរឿងដែលសំខាន់ជាងទៀត គឺឪពុក ឬម្តាយបំផ្លាញអនាគតកូនខ្លួនឯង តាមរយះសកម្មភាពមិនគប្បីដែលសង្គមស្អប់ខ្ពើមដូច ជាល្បែងសុីសង លួច ប្លន់ ជួញដូរគ្រឿងញៀន ស្រី ញី ប្រុសឈ្មោល សាហាយស្មន់។ល។ ដែលធ្វើឱ្យកូនៗកំពុងរៀនបាក់ទឹកចិត្ត និងខ្មាស់អៀន។
ចូរខិតខំទាំងអស់គ្នា ដើម្បីជាតិយើងរុងរឿង គ្រួសារមានសុភមង្គល កូនចៅយើងមានចំណេះដឹង និងមានគុណធម៌ខ្ពស់៕
ដោយ៖ សុវណ្ណារ៉ា
