ខេត្តកំពត៖ ទីតាំងក្រុមហ៊ុនរោងចក្រផលិតឥដ្ឋមួយកន្លែង ដែលប្រជាពលរដ្ឋរស់នៅភូមិ-ឃុំថ្មី ស្រុកទឹកឈូ ខេត្តកំពត អះអាងថា ពីមុនជាកម្មសិទ្ធិរបស់អតីតលោកឧកញ៉ាអ៉ឹង ម៉េងជឺ ដែលត្រូវខ្មាំងកាំភ្លើងបាញ់សម្លាប់នោះ។ បច្ចុប្បន្នក្មួយរបស់អតីតលោកឧកញ៉ា គឺលោក អ៉ឹង គីហេង ជាអ្នកបន្តការងារនៅរោងចក្រផលិតឥដ្ឋនេះ បានបញ្ជាឲ្យកូនចៅធ្វើបារ៉ាស់បិទផ្លូវ ដែលអតីតលោកឧកញ៉ាជាអ្នកធ្វើផ្លូវលំ សម្រាប់ឲ្យអ្នកភូមិជិះចេញចូល ប៉ុន្តែនាពេលថ្មីៗនេះ ត្រូវក្រុមហ៊ុនបិទផ្លូវចង់ធ្វើជាផលប្រយោជន៍របស់ផ្ទាល់ខ្លួនទៅវិញ។ ទើបធ្វើឲ្យពួកគាត់ជាច្រើនគ្រួសារមិនយល់ព្រមក៏នាំគ្នា ធ្វើការតវ៉ា កាលពីព្រឹកថ្ងៃទី២៨ ខែធ្នូ ឆ្នាំ២០២០ម្សិលមិញនេះ។
បើតាមការអះអាងពីប្រជាពលរដ្ឋ បានបន្តថា កាលពីជាង១០ឆ្នាំមុន ផ្លូវលំមួយខ្សែនេះ គឺអតីតលោកឧកញ៉ាអ៉ឹង ម៉េងជឺ ជាអ្នកកសាង ដោយធ្វើជាប់និងទីតាំងរោងចក្រផលិតឥដ្ឋ បន្ទាប់មកលោក ក៏បានទទួលមរណៈភាពទៅ។ ហើយរោងចក្រផលិតឥដ្ឋនេះ ត្រូវបានក្មួយប្រុសរបស់លោក ជាអ្នកគ្រប់គ្រងរហូតមកដល់បច្ចុប្បន្ន។ ប៉ុន្តែអ្វីដែលគាត់បានមើលឃើញនោះ គឺផ្លូវលំក្រាលក្រួសក្រហមមួយខ្សែត្រូវបានគេដាក់បារ៉ាស់បិទ មិនឲ្យជិះចេញចូល ទើបពលរដ្ឋនៅភូមិថ្មីទាំងអស់នាំគ្នាមកតវ៉ាតែម្តង។
បើតាមសម្តីប្រជាពលរដ្ឋម្នាក់ឈ្មោះ សុខ គន្ធី ភេទប្រុស អាយុ៣៩ឆ្នាំ បានរៀបរាប់ប្រាប់កាលពីព្រឹកថ្ងៃទី២៨ ធ្នូមិ្សលមិញនេះថា៖ គាត់ជាអ្នកមានគ្រឿងចក្រមួយគ្រឿងដែរ សម្រាប់ស៊ីឈ្មួលកាយដីឲ្យពលរដ្ឋ ប៉ុន្តែក្រុមហ៊ុនមិនគួរបិទផ្លូវបែបនេះទេ ព្រោះពលរដ្ឋក៏ដូចរូបគាត់មានសិទ្ធិធ្វើដំណើរចេញចូលតាមផ្លូវនេះបាន។ ពលរដ្ឋរូបនេះ បន្តថា ខ្លួនមិនបានដឹកដីបំផ្លាញផ្លូវលំអតីតផ្លូវលំលោកឧកញ៉ាអ៉ឹង ម៉េងជឺ នោះទេ គឺមានតែជួយថែទាំជាប្រចាំក្នុងនាមខ្លួនគាត់មានគ្រឿងចក្រមួយគ្រឿងដែរនៅក្នុងភូមិថ្មី។
ជាមួយគ្នានេះ ប្រជាពលរដ្ឋម្នាក់ទៀតឈ្មោះកូវ សេង ភេទស្រី អាយុ៥២ឆ្នាំ បាននិយាយទាំងអួលដើមកថា ផ្លូវលំអតីតលោកឧកញ៉ាអ៉ឹង ម៉េងជឺនេះ កាលពីមុនផ្លូវរទេះចេញពីព្រៃដឹងរហូតដល់ផ្លូវជាតិលេខ3។ តែក្រោយមកលោក អ៉ឹង ម៉េងជឺ គាត់ទិញដីបាននៅទីនេះក៏លោកចំណាយថវិកាកសាងផ្លូវនេះឲ្យស្អាតងាយស្រួលពលរដ្ឋចេញចូលបានកាន់តែល្អ។ បន្ថែមពីនេះ ស្រ្តីរូបនេះ ក៏បានសំណួមពរឲ្យលោកអភិបាលខេត្ត មេត្តាជួយដោះស្រាយរឿងគេបិទផ្លូវនេះផង។
ទាក់ទិននឹងករណីនេះដែល លោក សេង ថូង មេឃុំថ្មី នៅថ្ងៃនេះដែរលោកក៏បានចុះមកដល់កន្លែងទីតាំងគេបិទបារ៉ាស់ ដោយលោកនិយាយថា លោកទទួលស្គាល់ថា ផ្លូវចាស់ពីដើមមែន ប៉ុន្តែបើយើងបើកបរឆ្លងកាត់ហើយគួរណាស់ថែមើលទើបវាបានល្អស្អាត។
លោកមេឃុំ បានបន្ថែមទៀតថា ផ្លូវនេះប្រជាពលរដ្ឋអាចធ្វើដំណើរបាន ប៉ុន្តែហាមឃាត់រថយន្តដឹកធ្ងន់មិនឲ្យបើកឆ្លងកាត់។ មិនតែប៉ុណ្ណោះលោកថា ចំពោះការតវ៉ារបស់ប្រជាពលរដ្ឋជុំវិញករណីនេះ លោកនឹងខិតខំទំនាក់ទំនងជាមួយតំណាងក្រុមហ៊ុនផលិតឥដ្ឋ ដើម្បីឲ្យមានការបើផ្លូវនេះជាធម្មតាវិញ៕ដោយ៖សហការី
