កីឡាករ Cristiano Ronaldo ត្រូវបានជាប់ឈ្មោះជាកីឡាករឆ្នើមប្រចាំសតវត្សរ៍ទី២១ បន្ទាប់ពីឈ្នះគូប្រជែងពានរង្វាន់នេះលើកីឡាករ Lionel Messi, Ronaldinho និង Mohamed Salah ។ ចំណែកគ្រូបង្វឹកឆ្នើមប្រចាំសតវត្សរ៍ទី២១ដែរបានទៅលើលោក Pep Guardiola ។ នេះបើយោងតាមការចុះផ្សាយរបស់សារព័ត៌មានអេស្ប៉ាញ Marca កាលពីថ្ងៃទី២៨ ខែធ្នូ ឆ្នាំ២០២០ម្សិលមិញនេះ។
ព្រឹត្តិការណ៍មួយដែលត្រូវបានធ្វើឡើងនៅក្នុងទីក្រុងឌូបៃ ខ្សែប្រយុទ្ធសញ្ជាតិព័រទុយហ្គាល់រូបនេះត្រូវបានគេចាត់ទុកថា ជាកីឡាករល្អបំផុតនៅចន្លោះឆ្នាំ២០០១ និងឆ្នាំ២០២០ បន្ទាប់ពីបានជួយឲ្យក្លិបឈ្នះពានរង្វាន់ Champions League ចំនួន៥, ពានរង្វាន់ Premier League ចំនួន៣ជាមួយក្រុម Manchester United និងពានរង្វាន់ La Liga ចំនួន២ ជាមួយក្រុម Real Madrid ក៏ដូចជាពានរង្វាន់ Nations League ជាមួយព័រទុយហ្គាល់។
Cristiano Ronaldo បាននិយាយថា “អរគុណដល់អ្នករាល់គ្នាដែលបានបោះឆ្នោតឱ្យខ្ញុំ គ្រួសារខ្ញុំ ម្តាយនិងបងប្អូនរបស់ខ្ញុំ។
វាជាសមិទ្ធផលដ៏ពិសេសមួយ វាផ្តល់ឱ្យខ្ញុំនូវកំលាំងចិត្តដើម្បីឆ្ពោះទៅមុខ។ ដើម្បីក្លាយជាអ្នកដែលមានឈ្មោះថាជាកីឡាករល្អជាងគេគឺជាកិត្តិយសដ៏ខ្ពង់ខ្ពស់ខ្ញុំសង្ឃឹមថាស្ថានភាពនេះនឹងកើតឡើងនៅឆ្នាំក្រោយ ហើយយើងអាចរីករាយបន្ថែមទៀត។ ខ្ញុំសង្ឃឹមថានឹងនៅតែអាចលេងបានច្រើនឆ្នាំទៀតដែលវាជាសមិទ្ធផលដ៏ពិសេសមួយ”។
កីឡាករ Cristiano Ronaldo បានបង្ហាញខ្លួនក្នុងពានរង្វាន់ PLAYER OF THE CENTURY 2001-2020 Globe Soccer Award ដោយលោក HH Sheikh Ahmed bin Mohammed bin Rashid Al Maktoum ជាប្រធានក្រុមប្រឹក្សាកីឡាក្រុងឌូបៃ។
ក្នុងកម្មវិធីប្រគល់ពានរង្វាន់ Globe Soccer Awards នោះដែរក៏បានផ្តល់ពានរង្វាន់ដល់ខ្សែប្រយុទ្ធឆ្នើមប្រចាំឆ្នាំជួនកីឡាករ Robert Lewandowski, គ្រូបង្វឹកឆ្នាំឆ្នើមប្រចាំឆ្នាំលោក Hans Dieter Flick lifted និងលោក Iker Casillas ទទួលបានពានរង្វាន់ជាកីឡាករអាជីពប្រចាំឆ្នាំផងដែរ។ ជាមួយគ្នានោះលោក Pep Guardiola ត្រូវបានគេបោះឆ្នោតជូនជាគ្រូបង្វឹកឆ្នើមប្រចាំសតវត្សរ៍ទី២១ ដោយលោកធ្លាប់បានដឹកនាំក្លិប Bayern Munich, Barcelona និង Liverpool ទទួលបានជោគជ័យ និងបានជួយក្លិបទាំងនោះលើកពានរង្វាន់ជាច្រើនផងដែរ។
កាសែតអេស្ប៉ាញ Marca ជាកាសែតផ្លូវការនៃការផ្សាយពីកម្មវិធីពានរង្វាន់ Globe Soccer Awards សម្រាប់ឆ្នាំ២០២០ ដែលមានអ្នកចូលរួមត្រូវបានជ្រើសរើសដោយអ្នកគាំទ្រមកពីទូទាំងពិភពលោកក៏ដូចជាគណៈវិនិច្ឆ័យដែលមានសមាជិក២៥នាក់ដែលរាប់បញ្ចូលទាំងលោក Eric Abidal, Antonio Conte និងលោក Deco ផងដែរ ៕
ដោយ៖ភារៈ
