អន្តរជាតិ៖ ប្រទេស អារ៉ាប៊ី សាអូឌីត បានសម្រេចបើកព្រំដែន អាកាសដែនគោក និងដែនទឹកជាមួយប្រទេសកាតារឡើងវិញ ។ សកម្មភាពខាងលើកើតឡើងមុនកិច្ចប្រជុំកំពូលស្តីពីកិច្ចសហប្រតិបត្តិការណ៍ តំបន់ឈូងសមុទ្រ(GCC)ដែលរៀបចំឡើងកនុងទីក្រុងAl-Ula ប្រទេស អារ៉ាប៊ី សាអូឌីត នាថ្ងៃទី៥ខែមករាឆ្នាំ២០២១។
អ្នកសារព័ត៌មាន TTXVN ប្រចាំតំបន់មជ្ឈិមបូព៌ា បានរាយការណ៍ថា រដ្ឋមន្ត្រីការបរទេសគុយវែតលោក Ahmad Nasser Al-Sabah នៅថ្ងៃទី៤ខែមករា ឆ្នាំ២០២១បានប្រកាសថា អារ៉ាប៊ីសាអូឌីត បានបើកដែនអាកាសដែនទឹកនិងដែនគោកជាមួយប្រទេសកាតារចាប់ពីថ្ងៃទី៤ខែមករាឆ្នាំ២០២១។ ការបើកព្រំដែនទាំងស្រុងឡើងវិញគឺមុនមួយថ្ងៃនៃកិច្ចប្រជុំបណ្តាប្រទេសឈូងសមុទ្រ(GCC) ធ្វើឡើងក្នុងប្រទេសអារ៉ាប៊ី សាអូឌីត។
រដ្ឋមន្ត្រីការបរទេសគុយវែតបានលើកឡើងថា តាមសំណើររបស់ព្រះមហាក្សត្រគុយវែត ព្រះចៅNawaf Al-Ahmed Al-Jaber ប្រទេសអារ៉ាប៊ី សាអូឌីតបានសម្រេចបើកព្រំដែនទាំងស្រុងឡើងវិញជាមួយកាតារ តាមកិច្ចព្រមព្រៀងដើម្បីដោះស្រាយវិវាទនយោបាយ ប្រទេសក្នុងតំបន់។
ព្រំដែនគោកតែមួយគត់របស់ប្រទេសកាតារត្រូវបានបិទទ្វារតាំងពីឆ្នាំ២០១៧ ក្រោយពេល អារ៉ាប៊ីសាអូឌីត អេហ្ស៊ីប និង អារ៉ាប់រួម ព្រមទាំងបារ៉ែន បានចោទប្រកាន់ប្រទេសកាតារគាំទ្រក្រុមភេរវកម្មអ៊ីស្លាម និងជួយដល់ប្រទេសអ៊ីរ៉ង់។
ជាមួយគ្នានោះប្រទេសគុយវែតដើរតួនាទីជាអាជ្ញាកណ្តាល បានខិតខំដើម្បីផ្សះផ្សាទំនាក់ទំនងភាគីទាំងសង្ខាងឲ្យកាន់តែប្រសើរឡើងវិញ។ ការសម្រេចបើកព្រំដែន គឺជាការបើកផ្លូវសម្រាប់ប្រទេសកាតារចូលរួមក្នុងកិច្ចប្រជុំ GCC នៅថ្ងៃទី៥ខែមករាឆ្នាំ២០២១។
ប្រព័ន្ធផ្សព្វផ្សាយអារ៉ាប៊ី សាអូឌីតបានដកស្រង់ព្រះបន្ទូលរបស់ ព្រះរាជទាយាទ Mohammed bin Salman ដែលមានព្រះបន្ទូលថាកិច្ចប្រជុំGCC គឺគ្រប់ដណ្តប់លើកគ្រប់បញ្ហា ក្នុងនោះមានការឯកភាព សាមគ្គីភាពប្រទេសក្នុងតំបន់ដើម្បីទប់ស្កាត់ឧបសគ្គ ដែលអាចកើតឡើងក្នុងតំបន់៕
