ខេត្តកណ្ដាល៖ជនជាសង្ស័យជាឃាតករ ចាក់សម្លាប់នារីវ័យក្មេងម្នាក់ ស្លាប់ក្នុងឈាម ត្រូវបានសមត្ថកិច្ចឃាត់ខ្លួនបានហើយ នៅមុននេះបន្តិចនាព្រឹកថ្ងៃទី៥ ខែមករា ឆ្នាំ២០២១ បន្ទាប់ពីធ្វើសកម្មភាពបានប្រមាណជិត ២ ម៉ោងនោះ។ 

ជាបឋមសមត្ថកិច្ចបានឲ្យដឹងថា ជនសង្ស័យមានឈ្មោះ ទូច សជាតិ ហៅ(អាដំរី) អាយុ៣៥ឆ្នាំ រស់នៅកន្លែងកើតហេតុខាងលើ។  ឃាត់ខ្លួនបាន ខណៈរូបគេធ្វើជាប្រើល្បិចមកមើលសាកសព ដែលសមត្ថកិច្ចមកដល់កន្លែងកើតហេតុពិនិត្យ និងធ្វើកោសល្យវិច័យ។

សូមបញ្ជាក់ថា , នៅវេលាម៉ោង៧និង៣០នាទីព្រឹកថ្ងៃទី៥ ខែមករា ឆ្នាំ២០២១ មានអំពើឃាតកម្មមួយបានកើតឡើងនៅភូមិ-សង្កាត់ ព្រែកហូរ ក្រុងតាខ្មៅ ខេត្តកណ្ដាល ជនដៃដល់បានយកកាំបិតចាក់ជាច្រើនកន្លែងនៅលើដើមទ្រូងនិងពោះជនរងគ្រោះ។ ក្រោយកើតហេតុ ក្រុមគ្រួសារបានដឹកជនរងគ្រោះទៅកាន់មន្ទីរពេទ្យជ័យជំនៈ ប៉ុន្តែជាអកុសលមុខរបួសមានករណីធ្ងន់ធ្ងរ ក៏បណ្ដាលឱ្យជនរងគ្រោះត្រូវស្លាប់ពេលជូនដល់មន្ទីរពេទ្យ។

សមត្ថកិច្ចបានបន្តថា, ក្រោយកើតហេតុប្រមាណជាង ១ម៉ោង សមត្ថកិច្ចក៏បានក្តាប់មុខសញ្ញាបាន បន្ទាប់ពីទទួលដំណឹងខ្លះៗពីសាក្សីដែលត្រូវជាសាច់ថ្លៃសពជនរងគ្រោះ  ទើបសមត្ថកិច្ចធ្វើការឃាត់ខ្លួនជនសង្ស័យជាឃាតក ខាងលើយកមកធ្វើការសាកសួរតាមនីតិវិធី៕

ដោយ៖ស្អាងជ័យ