ប្រភពព័ត៌មានប៊ីប៊ីស៊ី កាលពីថ្ងៃទី២២ ខែកុម្ភៈ ឆ្នាំ២០១៦ បានផ្សព្វផ្សាយថា ក្រុមរដ្ឋអិស្លាម IS បានប្រកាសទទួលស្គាល់ថា ពួកគេបានធ្វើសកម្មភាពវាយប្រហារនៅក្នុងទីក្រុងដាម៉ាកាស និងទីក្រុង ហូម របស់ស៊ីរីបណ្តាលឲ្យមនុស្សយ៉ាងតិច១៤០នាក់បាត់បង់ជីវិត ។
ប្រព័ន្ធផ្សព្វផ្សាយនៅក្នុងតំបន់បានរាយការណ៍ថា ការបំផ្ទុះគ្រាប់បែក៤លើកបានកើតឡើងនៅតំបន់ Sayyida Zeinab ជាយក្រុងដាម៉ាកាសបណ្តាលឲ្យស្លាប់មនុស្ស៨៣នាក់ ខណៈដែលក្រុមសង្កេតការណ៍សិទិ្ធមនុស្សបានបញ្ជាក់នៅក្នុងរបាយការណ៍ថា ការបំផ្ទុះគ្រាប់បែកក្នុងរថយន្តអត្តឃាតបានកើតឡើង២លើកស្ថិតនៅក្នុងទីក្រុង Homes កាលពីពេលថ្មីនេះបណ្តាលឲ្យស្លាប់ជនស៊ីវិលយ៉ាងតិច៥៧នាក់ ។
ការវាយប្រហារខាងលើនេះត្រូវគេប្រកាសឲ្យដឹងថា ជាទង្វើរបស់ក្រុមរ៉ាឌីកាលរដ្ឋអិស្លាម IS ។ ការវាយប្រហារនេះបានកើតមានឡើង បន្ទាប់ពីប្រធានាធិបតីស៊ីរី លោកបាសា អាល់អាសាដ បានថ្លែងប្រាប់បណ្តាញព័ត៌មានថា ជនភៀសខ្លួនស៊ីរីទាំងឡាយគួរកុំមានការភ័យខ្លាចចំពោះការវិលត្រឡប់មកកាន់ស្រុកកំណើតវិញ ។
លោកអាល់អាសាដ ដែលរងចោទប្រកាន់ថា បានធ្វើសកម្មភាពកាប់សម្លាប់ពលរដ្ឋរបស់ខ្លួនឯងនោះបានថ្លែងថា ជាការធម្មតានោះទេ ពលរដ្ឋស៊ីរីតែងតែភៀសខ្លួនពីស្រុកកំណើតដោយសារតែជម្លោះ និងកត្តាជីវភាពរស់នៅរបស់ក្រុមគ្រួសារប្រចាំថ្ងៃ ។ ពលរដ្ឋទាំងឡាយដែលភៀសខ្លួនទាំងនោះអាចវិលត្រឡប់មកកាន់ស្រុកកំណើតរបស់ខ្លួនវិញ ដោយមិនខ្លាចពីសកម្មភាពរបស់រដ្ឋាភិបាលឡើយ ។ លោកអាល់អាសាដ ថ្លែងថា យើងចង់បានពលរដ្ឋវិលត្រឡប់មកស្រុកកំណើតវិញ ។
សង្គ្រាមនៅក្នុងស៊ីរីរហូតមកដល់ពេលនេះត្រូវគេប៉ាន់ប្រមាណថា បណ្តាលឲ្យស្លាប់មនុស្សជាង២៥០.០០០នាក់ ។ ក្រៅពីនេះ ពលរដ្ឋជាង១១លាននាក់ផ្សេងទៀតបានបង្ខំចិត្តភៀសខ្លួនចេញពីលំនៅឋាន ខណៈដែលពលរដ្ឋ៤លាននាក់បានភៀសខ្លួនចេញទៅក្រៅប្រទេស រហូតដល់ប្រទេសសហគមន៍អឺរ៉ុប ដោយផ្សងគ្រោះថ្នាក់ដល់អាយុជីវិត ។
ទីភ្នាក់ងារព័ត៌មានសាណា របស់ស៊ីរីបានផ្សព្វផ្សាយថា មនុស្ស៨៣នាក់បានបាត់បង់ជីវិត និង១៧៨នាក់បានរងរបួស បន្ទាប់ពីហេតុការណ៍បំផ្ទុះគ្រាប់បែកច្រើនកន្លែងនៅតំបន់ Sayyida Zeinab កាលពីថ្ងៃទី២១ ខែកុម្ភៈ ឆ្នាំ២០១៦ ។
ទីភ្នាក់ងារព័ត៌មាន Amaq ដែលជាបណ្តាញព័ត៌មានមានការជិតស្និទ្ធជាមួយក្រមរដ្ឋអិស្លាម IS នោះបានផ្សព្វផ្សាយថា ក្រុមរដ្ឋអិស្លាមបានអះអាងថា ពួកគេជាអ្នកធ្វើសកម្មភាពបំផ្ទុះគ្រាប់បែកទាំងនោះ ។
អ្នកស្រុករស់នៅក្នុងតំបន់ម្នាក់បានប្រាប់រ៉យទ័រថា ខណៈដែលលោកកំពុងដេកនៅក្នុងគេហដ្ឋាន ស្រាប់តែឮសំឡេងផ្ទុះយ៉ាងខ្លាំង។ លោកអះអាងថា ជនវាយប្រហារគ្រាប់បែកបានពាក់គ្រាប់បែកនៅជាប់នឹងខ្លួន ។
នៅក្នុងទីក្រុង Homs ការវាយប្រហារគ្រាប់បែកបានកើតឡើងផងដែរ ស្ថិតនៅក្នុងសង្កាត់ Alawite ។ ការវាយប្រហារនេះបណ្តាលឲ្យស្លាប់មនុស្សច្រើននាក់ផងដែរ ។
ក្រុមសង្កេតការសិទ្ធិមនុស្សស៊ីរី មានមូលដ្ឋាននៅចក្រភពអង់គ្លេសបានអះអាងថា យ៉ាងហោចណាស់ក្រុមសកម្មប្រយុទ្ធរដ្ឋអិស្លាម៥០នាក់ត្រូវបានសម្លាប់ ខណៈដែលកងទ័ពរដ្ឋាភិបាលស៊ីរី ក្នុងប្រតិបត្តិការវាយប្រហាររុលទៅមុខដើម្បីគ្រប់គ្រងទឹកដីឡើងវិញ ដោយមានការជួយគាំពារពីលើដែនអាកាសរបស់កងទ័ពរុស្ស៊ី ស្ថិតនៅភាគខាងកើតប្រទេសក្នុងរយៈពេល២៤ម៉ោងប៉ុណ្ណោះ ៕
