ភ្នំពេញ៖ ថ្នាក់ដឹកនាំក្រសួងអប់រំ យុវជន និងកីឡា បានរៀបចំកិច្ចប្រជុំត្រៀមរៀបចំទិវាជាតិអំណាន ១១ មីនា សម្រាប់ឆ្នាំ២០២១ ដែលកម្មវិធីនេះត្រូវបានរៀបចំឡើងជារៀងរាល់ឆ្នាំដើម្បីលើកកម្ពស់វប្បធម៌អាន បង្កើនទម្លាប់អាននៅកម្ពុជា ធ្វើយ៉ាងណាធានាឱ្យកម្មវិធីនេះប្រព្រឹត្តទៅដោយរលូន ទោះបីកម្ពុជានៅតែប្រឈមមុខនឹងហានិភ័យនៃជំងឺកូវីដ-១៩ ក្ដី ដោយស្របតាមបរិបទគន្លងថ្មីនៃការអប់រំ។
កិច្ចប្រជុំនេះបានប្រព្រឹត្តទៅក្រោមការដឹកនាំដោយ លោក បណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ដោយមានការចូលរួមពីលោកស្រីទទួលបន្ទុក ថ្នាក់ដឹកនាំនាយកដ្ឋានអភិវឌ្ឍកម្មវិធីសិក្សា និងអង្គភាពពាក់ពន្ធ័មួយចំនួនទៀត នៅព្រឹកថ្ងៃទី១៨ ខែមករា ឆ្នាំ២០២១ នាទីស្ដីការក្រសួង។
សូមជម្រាបថា របៀបវារៈក្នុងកិច្ចប្រជុំនេះបានពិភាក្សាទៅលើប្រធានបទមួយចំនួនដូចជា គេហទំព័រទិវាជាតិអំណាន ព្រឹត្តិបត្រទិវាជាតិអំណាន ទស្សនាវដ្តីអប់រំ និងទិវាជាតិអំណាន។ ស្ថិតក្នុងបរិបទកូវីដ-១៩ កម្មវិធីខាងលើគ្រោងនឹងរៀបចំឡើងនៅលតែមួយពេល ដោយប្រព្រឹត្តទៅនៅទីតាំងដាច់ដោយឡែកពីគ្នា និងពុំមានពិធីបើកការប្រឡងប្រណាំងឡើយ ដើម្បីបង្ការទប់ស្កាត់ការរីករាលដាលនៃជំងឺកូវីដ-១៩៕
ដោយ, សិលា
