ខេត្តកណ្តាល ៖ សមត្ថកិច្ចនគរបាលស្រុកកោះធំបើកប្រតិបត្តិការបង្ក្រាបបទល្មើសគ្រឿងញៀនពេញមួយយប់ចាប់បានជនសង្ស័យ៤នាក់ ដកហូតបានថ្នាំញៀនម៉ាកទឹកកកចំនួន៤៨កញ្ចប់តូចនិង៥កញ្ចប់ធំ ។ ប្រតិបត្តិការនេះធ្វើឡើងនៅវេលាយប់ថ្ងៃទី១៥រហូតដល់វេលាទាបភ្លឺថ្ងៃទី១៦ ខែកក្កដា ឆ្នាំ២០១៥ នៅក្នុងភូមិសាស្ត្រឃុំសំពៅពូន ស្រុកកោះធំ ដឹកនាំដោយលោកវរសេនីយ៍ត្រី មុយ ចាន់ពេជ្រ អធិការនគរបាលស្រុក ។
អធិការនគរបាលស្រុកកោះធំលោក វរសេនីយ៍ត្រី មុយ ចាន់ពេជ្រ បានអោយដឹងថា អនុវត្តតាមបទបញ្ជារបស់លោកឧត្តមសេនីយ៍ត្រី អ៊ាវ ចំរើន ស្នងការនគរបាលខេត្ត កម្លាំងនគរបាលស្រុកកោះធំបានខឹតខំប្រឹងប្រែងចុះក្តាប់មុខ សញ្ញាពាក់ព័ន្ធបទល្មើសគ្រប់ប្រភេទ ជាពិសេសបទល្មើសគ្រឿងញៀន ។ ជាក់ស្តែងនៅយប់ថ្ងៃទី១៥ ខែកក្កដា ឆ្នាំ២០១៥ សមត្ថកិច្ចនគរបាលជំនាញក្តាប់បានមុខសញ្ញាជនសង្ស័យកំពុងធ្វើ សកម្មភាព ទើបលោកដឹកនាំកម្លាំងចុះទៅធ្វើការបង្ក្រាបឃាត់ខ្លួនបានជនសង្ស័យចែកចាយ និងជួញដូរគ្រឿងញៀនបាន៤នាក់ជាបន្តបន្ទាប់ ដកហូតបានវត្ថុតាងថ្នាំញៀនសរុបចំនួន៤៨កញ្ចប់តូចនិង៥កញ្ចប់ធំ , ម៉ូតូ២គ្រឿង ,សម្ភារៈសម្រាប់វេចខ្ចប់ចែកចាយគ្រឿងញៀន និងឧបករណ៍សម្រាប់ប្រើប្រាស់ជាច្រើនទៀតផងដែរ ។
លោក មុយ ចាន់ពេជ្រ បានបន្តថា ប្រតិបត្តិការទី១-ធ្វើឡើងនៅវេលាម៉ោង២១ និង៣០នាទី ថ្ងៃទី១៥ ខែកក្កដា ឆ្នាំ២០១៥ នៅត្រង់ចំណុចខាងជើងស្ពានលេខ៧០ តាមបណ្តោយផ្លូវជាតិលេខ២១បេ ស្ថិតក្នុងភូមិកំពុងថ្កុល ឃុំសំពៅពូន ចាប់បានជនសង្ស័យ២នាក់ ដកហូតបានថ្នាំញៀន២៤កញ្ចប់តូច និង១កញ្ចប់ធំ ,ម៉ូតូ១គ្រឿង ។ ជនសង្សយឈ្មោះ ស្រ៊ុន ស្រ៊ីម ភេទប្រុស អាយុ២៥ឆ្នាំ មុខរបរជាគ្រូពេទ្យព្យាបាលសត្វពាហនៈ និងម្នាក់ទៀតឈ្មោះ ឆន ឆៃលី ហៅខ្លី ភេទប្រុស អាយុ២១ឆ្នាំ មុខរបរមិនពិតប្រាកដ ទាំង២នាក់មានទីលំនៅក្នុងភូមិកំពង់ថ្កុល ឃុំសំពៅពូន។
ប្រតិបត្តិការបង្ក្រាបទី២-ធ្វើឡើងកាលពីវេលាម៉ោង៤និង៣០នាទីទាបភ្លឺថ្ងៃទី១៦ ខែកក្កដា ឆ្នាំ២០១៥ ត្រង់ចំណុចកាស៊ីណូក្រោន តាមបណ្តោយផ្លូវជាតិលេខ ២១បេ ស្ថិតក្នុងភូមិជ្រៃធំ ឃុំសំពៅពូន ឃាត់ខ្លួនបានជនសង្ស័យម្នាក់ ដកហូតបានថ្នាំញៀន២៣កញ្ចប់តូចនិង៤កញ្ចប់ ធំ ,ម៉ូតូ១គ្រឿង ។ ជនសង្ស័យឈ្មោះ ជ្រុន វិចិត្រ ភេទប្រុស អាយុ២៩ឆ្នាំ មុខរបរមិនពិតប្រាកដ មានទីលំនៅក្នុងភូមិកោះទាវ(ក) ឃុំសំពៅពូន ។
ប្រតិបត្តិការបង្ក្រាបទី៣-ធ្វើឡើងកាល ពីវេលាម៉ោង៥និង១០នាទីទាបភ្លឺថ្ងៃទី១៦ ខែកក្កដា ឆ្នាំ២០១៥ ត្រង់ចំណុចផ្សារជ្រៃធំ តាមបណ្តោយផ្លូវជាតិលេខ២១បេ ស្ថិតក្នុងភូមិជ្រៃធំ ឃុំសំពៅពូន ឃាត់ខ្លួនបានជនសង្ស័យម្នាក់ ដកហូតបានថ្នាំញៀន០១កញ្ចប់តូច ,ជញ្ជីងថ្លឹងគ្រឿងញៀន០១គ្រឿង និងសម្ភារៈវេចខ្ចប់ចែកចាយ ប្រើប្រាស់គ្រឿងញៀនមួយចំនួនធំ ។
​លោកអធិការបានបញ្ជាក់ គ្រឿងញៀនទាំងអស់ខាងលើនេះជនសង្ស័យបានសារភាពថាទិញពីមេក្លោងជួញដូរគ្រឿងញៀនដែលកំពុងលាក់ខ្លួននៅរាជធានីភ្នំពេញ ៕ស្អាងជ័យ