ក្នុងរយៈពេល៤ថ្ងៃកន្លងមកនេះ គ្មានសេចក្តីរាយការណ៍ថ្មីស្តីអំពីការឆ្លងវីរុសមឺស(មេរោគឆ្លងមកពីមជ្ឈិមបូព៌ា MERS) នោះទេនៅក្នុងប្រទេសកូរ៉េខាងត្បូង ដែលនេះត្រូវគេរំពឹងថា ការទប់ស្កាត់របស់ក្រុមគ្រូពេទ្យ ក៏ដូចប្រជាពលរដ្ឋទៅលើការឆ្លងរាលដាលនេះមានប្រសិទ្ធភាព ហើយឈានដល់ការបញ្ចប់ជាស្ថាពរការគំរាមកំហែងអាយុជីវិតពលរដ្ឋកូរ៉េខាងត្បូងពីវីរុសដ៏កាចសាហាវមួយនេះ។
ក្រសួងសុខាភិបាលកូរ៉េខាងត្បូងបានចេញសេចក្តីថ្លែងការណ៍ថា ការវិវឌ្ឍឆ្លងរាលដាលវីរុសមឺសគឺមិនមានទៀតទេ ក្រៅតែតាំងពីពេលកន្លងមកមាន១៨២ករណីនោះ។ ចាប់តាំងពីថ្ងៃទី២០ ខែឧសភា ឆ្នាំ២០១៥រៀងមក កូរ៉េខាងត្បូងគ្មានថ្ងៃណាមួយដែលថា គ្មានករណីឆ្លងវីរុសមឺសទេ គឺទើបតែមកដល់៤ថ្ងៃចុងក្រោយនេះ វីរុសមឺសដ៏កាចសាហាវនេះមិនមានករណីថ្មីទៀតទេ ដែលនេះទំនងជាប្រសិទ្ធភាពក្នុងការទប់ស្កាត់ ហើយអាចឈានដល់កាត់ផ្តាច់ការឆ្លងរាលទាំងស្រុងតែម្តង ។
គ្មានករណីថ្មីស្តីពីគ្រោះថ្នាក់ដល់អាយុជីវិតដោយសារតែវីរុសនេះទៀតទេ។ កូរ៉េខាងត្បូងនាពេលកន្លងមកមានករណីគ្រោះថ្នាក់ដល់អាយុជីវិតដោយសារតែវីរុសនេះមាន៣៣នាក់ ស្មើ១៨.១ភាគរយ។
ពលរដ្ឋ២នាក់ត្រូវអនុញ្ញាតឲ្យចាកចេញពីមន្ទីរពេទ្យវិលត្រឡប់ទៅកាន់លំនៅឋានរបស់ខ្លួនវិញ បន្ទាប់ពីក្រុមគ្រូពេទ្យរកមិនឃើញថា មានសញ្ញាវីរុសមឺសអ្វីទៀតនោះទេ ក្រោយពីការឆ្លង ហើយត្រូវក្រុមគ្រូពេទ្យត្រួតពិនិត្យ និងព្យាបាលនោះ ។ ការអនុញ្ញាតឲ្យអ្នកជំងឺវិលត្រឡប់ទៅកាន់លំនៅឋានបានកើនឡើង៩៧នាក់ ស្មើ៥៣.៣ភាគរយស្តីពីករណីដែលបានឆ្លង។
ក្រៅពីជនរងគ្រោះបាត់បង់ជីវិតចេញ គឺនៅមានអ្នកជំងឺ៤០នាក់ផ្សេងទៀតកំពុងស្ថិតក្រោមការព្យាបាលរបស់ក្រុមគ្រូពេទ្យ ។ ក្នុងចំណោមពួកគេទាំងនេះ មានអ្នកជីងឺ១២នាក់ស្ថិតក្នុងស្ថានភាពមិនប្រក្រតី។ កូរ៉េខាងត្បូងកំពុងស្ថិតនៅក្រោមការតាមដានត្រួតពិនិត្យសុខភាពទៅលើពលរដ្ឋ២.៤៥១នាក់នៅឡើយ ៕
