ភ្នំពេញ ៖ ជនសង្ស័យមានគ្នា៣នាក់ប្រដាប់ដោយកាំភ្លីមួយដើមបានធ្វើសកម្មភាពភ្ជុងប្លន់យកម៉ូតូបានហើយគេចខ្លូនដោយសុវត្តិភាព ។
ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង១០យប់ថ្ងៃទី១៥ ខែកក្កដា នៅតាមផ្លូវលំ ភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ ។
ជនរងគ្រោះមានឈ្មោះឆាយ ភក្កី ភេទស្រី អាយុ២១ឆ្នាំ មុខរបរលក់ចាបហួយ ស្នាក់នៅបន្ទប់ជួលភូមិកើតហេតុខាងលើ។
តាមការរៀបរាប់ពីជនរងគ្រោះបានឲ្យដឹងថា មុនពេលកើតហេតុដោយសារអស់អង្ករគាត់មិនបានដាំបាយទុកឲ្យប្តីទេ ។ ពេលប្តីត្រឡប់មកពីធ្វើការវិញខឹងវាយចានឆ្នាំង ធ្វើឲ្យប្រពន្ធខ្លាចប្តីប្រើអំពើហិង្សានាំមានរឿងវែងឆ្ងាយ ក៏ទុកកូនតូចម្នាក់ឲ្យប្តីមើល ហើយជិះម៉ូតូហុងដាឌ្រីម ស៊េរី២០១៥ ពណ៌ខ្មៅ ពាក់ស្លាកលេខ ភ្នំពេញ 1CS-5002 ជិះទៅរកទិញនំបុ័ងសាច់នៅមុខរោងចក្រ QMI ដោយសារយប់ជ្រៅទៅហើយ គេឈប់លក់ដូរក៏បានជិះម៉ូតូត្រឡប់មកវិញលុះមកជិតដល់ផ្ទះជួលស្រាប់តែលិចមុខជនសង្ស័យ៣នាក់ជិះម៉ូតូហុងដាឌ្រីមពណ៌ខ្មៅ មួយគ្រឿងប្រដាប់ដោយកាំភ្លើងខ្លីមួយដើម បានជិះម៉ូតូកៀររូបគាត់ហើយដកកាំភ្លើងភ្ជង់អោយចុះពីលើម៉ូតូហើយត្រូវជនសង្ស័យជិះគេចខ្លួនបាត់ដោយសុវត្តិភាព ។
ក្រោយពេលកើតហេតុទើបមានការផ្អើលឆោឡោថាចោរប្លន់ម៉ូតូទើបប្តីចេញមកបានស្តីបន្ទោសប្រពន្ធថា យប់ស្ងាត់ហើយនៅហ៊ានជិះម៉ូតូទៀត ។ ស្រ្តីរងគ្រោះបានទៅដាក់ពាក្យ បណ្តឹងនៅប៉ុស្តិ៍ចោមចៅជួយអន្តរាគមន៍ ៕សុខា សែនជ័យ
