ភ្នំពេញ៖ បន្ទាប់ពីជនជាតិចិនពីរក្រុម បានធ្វេីសកម្មភាពផ្ទុះអាវុធមួយគ្រាប់នៅក្នុងសណ្ឋាគារយីហោ«លី ស៊ីជិន» មួយកន្លែងនៅក្នុងបរិវេណកោះពេជ្រ ភ្លាមនោះបង្កការភ្ញាក់ផ្អេីលដល់កម្លាំងកងរាជអាវុធហត្ថរាជធានីភ្នំពេញ ចុះបង្រ្កាប និងឃាត់ខ្លួនបានជនជាតិចិននិងខ្មែរ សរុប៦នាក់។
ករណីជនជាតិចិនផ្ទុះអាវុធខាងលើនេះ បានកើតឡើងកាលពីវេលាម៉ោង១០និង៣០នាទីយប់ថ្ងៃទី៣១ មករា នៅចំណុចសណ្ឋាគារយីហោ «លី ស៊ីជិន» ស្ថិតនៅជាន់ទី៨ ស្ថិតក្នុងបរិវេណកោះពេជ្រ ភូមិ១៤ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
បើតាមប្រភពព័ត៍មានពីកន្លែងកើតហេតុ បានឲ្យដឹងថា មុនពេលកើហេតុមានករណីផ្ទុះអាវុធមួយគ្រាប់ បង្កឡេីងដោយក្រុមជនជាតិចិនពីរក្រុម បានឈ្លោះប្រកែកគ្នារហូតឈានដល់ការផ្ទុះអាវុធមួយគ្រាប់ ផ្អើលដល់កម្លាំងកងរាជអាវុធហត្ថរាជធានីភ្នំពេញ និងកម្លាំងនគរបាលចម្រុះបានបេីកប្រតិបត្តិការចុះឡោមព័ទ្ធសណ្ឋាគារនេះ បានឃាត់មនុស្សចំនួន៦នាក់ ក្នុងនោះ ចិន៥នាក់ និងខ្មែរម្នាក់ និងដកហូតកាំភ្លើងខ្លីចំនួន២ដើមផងដែរ។
ចំណែកបុរសម្នាក់ ជាសន្តិសុខនៅកោះពេជ្រ ក៏បានឱ្យដឹងដែរថា នៅវេលាម៉ោងកើតហេតុខាងលើ ពេលខ្លួនកំពុងអង្គុយនៅគោលដៅបុរីវរជន ក៏បានឮសំលេងផ្ទុះអាវុធ១គ្រាប់ ចេញពីអគារនោះ តែមិនដឹងថា មានរឿងអ្វីកើតឡើងនោះទេ។
បើតាមលោក វរសេនីយ៍ទោ មៀច ឈួនសុីម៉ូលីន អធិការរងខណ្ឌចំការមន ក៏បានប្រាប់អង្គភាពនគរដ្រេហ្គន នៅរសៀលថ្ងៃទី០១ ខែកុម្ភៈ ឆ្នាំ២០២១នេះថា ពាក់ព័ន្ធករណីខាងលេីនេះ គឺជនជាតិចិន២ក្រុមនេះបានឈ្លោះប្រកែកគ្នារឿងជំពាក់លុយ។ ប៉ុន្តែពេលនិយាយគ្នាមិនត្រូវក៏មានការផ្ទុះអាវុធតែម្តង តែមិនមានអ្នករងរបួសនោះទេ។
ក្រោយប្រតិបត្តិការរួច ជនសង្ស័យទាំងអស់ត្រូវបានកងរាជអាវុធហត្ថរាជធានីភ្នំពេញ ឃាត់ខ្លួនបញ្ជូនទៅសាកសួរបន្ត ដើម្បីអនុវត្តតាមនិតិវិធី៕ដោយ៖ជីណា
