ខេត្តព្រៃវែង៖ រថយន្តសណ្ដោងគ្នា២គ្រឿងបានបើកធ្លាក់ផ្លូវ ដោយសារតែអ្នកបើករថយន្តអូសងងុយដេក ក៏ធ្មេចមួយភាំង ទើបរថយន្តរេចង្កូតធ្លាក់ផ្លូវទាំង២គ្រឿង បណ្ដាលឲ្យមនុស្សដែលជិះក្នុងរថយន្ត៤នាក់រងរបួសស្រាល បង្កការភ្ញាក់ផ្អើល នៅវេលាម៉ោង១ និង៤០នាទីយប់រំលងអធ្រាត្រ ឈានចូលថ្ងៃទី១៦ ខែកក្កដា ឆ្នាំ២០១៥ លើកំណាត់ផ្លូវជាតិលេខ១ ស្ថិតក្នុងភូមិសឹង ឃុំកំពង់សឹង ស្រុកព្រះសេ្ដចខេត្តព្រៃវែង។
តាមប្រភពពីកម្មករដែលជិះលើរថយន្តបានរៀបរាប់ថា មុនពេលកើតហេតុ ពួកគេបានបើករថយន្តដឹកកង្កែបពីប្រទេសវៀតណាម ចេញតាមច្រកបន្ទាយស្រី ទៅដាក់ឲ្យអតិថិជននៅភ្នំពេញដោយរថយន្ត២គ្រឿង។ លុះត្រឡប់មកវិញក៏យប់ទៅហើយ ហើយរថយន្ត១គ្រឿងបានខូច ទើបពួកគេដាក់ខ្សែសណ្តោងបើកទាំងកណ្តាលអធ្រាត្រ។ ខណៈកំពុងបើកសណ្តោង ស្រាប់តែតៃកុងរថយន្តខាងមុខងងុយដេក ក៏ងោករេបណ្ដាលឲ្យរេចង្កូតធ្លាក់ផ្លូវ អូសទាំងរថយន្តពីក្រោយទៅជាមួយ ក្រឡាប់ធ្លាក់កម្មកររងរបួសស្រាល។
ក្រោយកើតហេតុ ភាគីម្ចាស់រថយន្តបានហៅរថយន្តស្ទូច មកស្ទូចយកទៅដោយខ្លួនឯង៕ សហការី
