ខេត្តព្រះវិហារៈ ក្មេងស្រីជាសិស្សសាលា២នាក់ បានស្លាប់ នៅលើផ្លូវជាតិលេខ៦៤ ត្រង់ចន្លោះបង្គោលគីឡូម៉ែត្រ លេខ៨១ និង៨២ ក្នុងភូមិស្រយង់ជើង ឃុំស្រយង់ ស្រុកគូលែន ខេត្តព្រះវិហារ កាលពីវេលាម៉ោង១រសៀល ថ្ងៃទី៦ ខែកុម្ភៈ ឆ្នាំ២០២១ដោយសាររថយន្តបុកគ្រាដែលជនរងគ្រោះទាំង២នាក់ជិះម៉ូតូឌុបគ្នាទៅសាលា។
ប្រភពព័ត៌មានពីកន្លែងកើត្េតុបានឲ្យដឹងថារថយន្តបង្កម៉ាកតូយ៉ូតា ហៃយ៉ាស់ (Toyota Hiace) ពណ៌ទឹកប្រាក់ ពាក់ស្លាកលេខ រតនគិរី 2C.3616 បានបុកម៉ូតូម៉ាកហុងដា ឌ្រីម ពណ៌ខ្មៅ ស៊េរីឆ្នាំ២០១០ ពាក់ស្លាកលេខ សៀមរាប 1G.6274 បណ្តាលឱ្យសិស្សសាលា ពីរនាក់ បានស្លាប់នៅនឹងកន្លែង។
ជនរងគ្រោះ ឈ្មោះ សៀន សុភ័ក្រ ភេទស្រី អាយុ១៤ឆ្នាំ បានស្លាប់នៅនឹងកន្លែង។ ជនរងគ្រោះម្នាក់ទៀត ឈ្មោះ ចន ម៉ាណា ភេទប្រុស អាយុ ៩ ឆ្នាំ មុខរបរសិស្ស បានស្លាប់ នៅពាក់កណ្ដាលផ្លូវ ពេលដឹកទៅមន្ទីរពេទ្យ។ ជនរងគ្រោះ ទាំង ២ នាក់ រស់នៅអូរច្រាប ភូមិគូលែនត្បូង ឃុំគូលែនត្បូង ស្រុកគូលែន ខេត្តព្រះវិហារ ។
ចំណែកអ្នកបើកបររថយន្ត មិនស្គាល់អត្តសញ្ញាណ បានរត់គេចខ្លួនបាត់។
ប្រភពដដែលបានឲ្យដឹងទៀតថាក្រោយកើតហេតុកម្លាំងនគរបាលចរាចរណ៍ស្រុកគូលែន បានយករថយន្ត និងម៉ូតូ ទៅរក្សាទុក នៅអធិការដ្ឋាននគរបាលស្រុក ដើម្បីអនុវត្តតាមនីតិវិធី និងបានប្រគល់សពជនរងគ្រោះទាំង២នាក់ឲ្យក្រុមគ្រួសារយកទៅធ្វើបុណ្យតាមប្រពៃណី៕
ដោយ÷ប្រាថ្នា
