ខេត្តមណ្ឌលគិរី៖ កុមារីអភ័ព្វម្នាក់ អាយុទើបតែ៤ឆ្នាំប៉ុណ្ណោះ ត្រូវឪពុកដែលខឹងនឹងម្តាយនោះ ចាប់គ្រវែងពីលើផ្ទះធ្លាក់មកលើដីបណ្តាលឲ្យរងរបួសធ្ងន់ ។ ទង្វើព្រៃផ្សៃនេះធ្វើឲ្យមានការរិះគន់យ៉ាងខ្លាំងពីសំណាក់ប្រជាពលរដ្ឋ ដែលមិនគួរណាឪពុកបង្កើតសោះ បែរជាខ្វះក្តីមេត្តាចំពោះកូនរបស់ខ្លួន មិនស្មើនឹងសត្វ ។
ហេតុការណ៍ខាងលើនេះបានកើតឡើងកាលពីថ្ងៃទី២៥ ខែកុម្ភៈ ឆ្នាំ២០១៦ ស្ថិតនៅភូមិឡៅរមៀត ឃុំក្រង់តេះ ស្រុកពេជ្រាដា ខេត្តមណ្ឌលគិរី ។ ជនសង្ស័យប្រើអំពើហិង្សាទៅលើកូនខ្លួនឯង ឈ្មោះស្រូវ ម្លង់ អាយុ៣២ឆ្នាំ ជនជាតិព្នង រស់នៅភូមិ ឃុំ កើតហេតុខាងលើ ។
ជនសង្ស័យស្រូវ ម្លង់ នៅរសៀលថ្ងៃទី២៦ ខែកុម្ភៈ ត្រូវបាននាំខ្លួនមកកាន់ការិយាល័យខេត្តដើម្បីសួរនាំ ។ ជនសង្ស័យ ស្រូវ ម្លង់ បានសារភាពថា ពិតជាបានប្រព្រឹត្តមកលើកូនរបស់ខ្លួនពិតមែន ដោយសាររូបគេខឹងប្រពន្ធ ។ នៅ រសៀលថ្ងៃដដែលនោះដែរ គេបានឃើញប្រពន្ធ ជនសង្ស័យ មកកាន់ការិយាល័យព្រហ្មទ័ណ្ឌកំរិតស្រាលខេត្តមណ្ឌលគិរី អង្វរប៉ូលិសសុំឱ្យដាក់ទោសប្តីរបស់គាត់១ខែបានហើយ ព្រោះជិតដល់រដូវកាប់ចំការ គ្មានអ្នកណារកស៊ីចឹញ្ចឹមកូនទេ ៕
