ក្រុមម្ចាស់ផ្ទះ Atalanta បានយកឈ្នះក្រុមភ្ញៀវ Napoli ក្នុងលទ្ធផល ៣ទល់១ សម្រាប់ការប្រកួតវគ្គជម្រុះពាក់កណ្តាលផ្តាច់ព្រ័ត្រជើងទី២ កាលពីរំលងអធ្រាត្រឈានចូលថ្ងៃទី១១ ខែកុម្ភៈ ឆ្នាំ២០២១។ នេះបើយោងតាមការចុះផ្សាយរបស់ BBC Sport នៅព្រឹកនេះ។

ការប្រកួតចាប់ផ្តើមតង់ទី១ ក្រុមម្ចាស់ផ្ទះ Atalanta មានឱកាសរកគ្រាប់បាល់នាំមុខនៅនាទីទី១០ ដោយកីឡាករ Zapata ។ ចូលដល់នាទីទី១៦ កីឡាករ Pessina របស់ក្រុម Atalanta មានឱកាសរកគ្រាប់បាល់នាំមុខ១គ្រាប់ទៀត ធ្វើឲ្យចប់ការប្រកួតក្រុមម្ចាស់ផ្ទះ Atalanta នាំមុខក្រុមភ្ញៀវ Napoli ២ទល់០។

ចូលដល់ការប្រកួតតង់ទី២ ក្រុម Napoli បានព្យាយាមវាយសម្រុកយ៉ាងខ្លាំង ដែលមានឱកាសគ្រប់គ្រងបាល់បាល់រហូតដល់៦០ភារយ។ នៅនាទីទី៥៣កីឡាករ Lozano របស់ក្រុម Napoli មានឱកាសរកបាន១គ្រាប់សងវិញ ប៉ុន្តែចូលដល់នាទីទី៧៨ កីឡាករ Pessina របស់ក្រុម Atalantaដដែលរកបាន១គ្រាប់ទៀត ធ្វើឲ្យចប់ការប្រកួតក្រុម Atalanta យកឈ្នះក្រុម Napoli ៣ទល់១ សរុបទាំង២ជើង។

ក្រុម Napoli ធ្វើមិនបានល្អក្នុងការប្រកួតជើងទី១ក្នុងទឹកដីរបស់ខ្លួន ដោយទទួលបានលទ្ធផលស្មើគ្នា០ទល់០ប៉ុណ្ណោះ ហើយនៅជើងទី២នេះ ក្រុម Napoli នៅតែមិនអាចរកគ្រាប់បាល់សងវិញទៅលើក្រុម Atalanta ដែរ។ ដូច្នេះក្រុម Atalanta មានឱកាសឡើងទៅប្រកួតវគ្គផ្តាច់ព្រ័ត្រពានរង្វាន់ Coppa Italia ២០២១ ជាមួយក្រុមសេះបង្កង់ Juventus ដែលបានយកឈ្នះក្រុម Inter Milan ទាំង២ជើងក្នុងលទ្ធផល ២ទល់១ កាលពីវគ្គពាក់កណ្តាលផ្តាច់ព្រ័ត្រ។

សូមបញ្ជាក់ថា ការប្រកួតវគ្គផ្តាច់ព្រ័ត្រ Coppa Italia ឆ្នាំ២០២១ នឹងប្រព្រឹត្តទៅនៅថ្ងៃទី១៩ ខែឧសភា ខាងមុខ ដែលអតីតម្ចាស់ពានរង្វាន់កាលពីឆ្នាំមុនគឺក្រុម Napoli ដែលបានយកឈ្នះក្រុម Juventus ដោយបាល់កាត់សេចក្តីប៉េណាល់ទី ៤ទល់២ ៕

  

ដោយ៖ភារៈ