ខេត្តត្បូងឃ្មុំ៖ វិហារឥស្លាមថ្មីមួយខ្នង ដែលមានទំហំ ១៥ គុណនឹង ២០ម៉ែត្រ ស្ថិតនៅភូមិជៀសទី២ ឃុំថ្មពេជ្រ ស្រុកត្បូងឃ្មុំ ខេត្តត្បូងឃ្មុំ ត្រូវបានសម្ពោធដាក់ឱ្យប្រើប្រាស់ជាផ្លូវការ នៅព្រឹកថ្ងៃទី២៨ ខែកុម្ភៈ ឆ្នាំ២០១៦ ដោយមានការ ចូលរួមពីលោក អូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រី និង ជារដ្ឋលេខាធិការ ក្រសួងការងារ និង បណ្តុះបណ្តាលវិជ្ជាជីវៈ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយរដ្ឋមន្ត្រី នៃព្រះរាជា ណាចក្រកម្ពុជា ។
លោក អូស្មាន ហាស្សាន់ បានបញ្ជាក់ថា៖ វិហារនេះត្រូវបានសាងសង់ឡើង ដោយចំណាយ ថវិការសរុបអស់ ៧៧.៩០០ដុល្លារអាមេរិក និង ប្រាក់រៀល ៧.៧៨៦.០០០ រៀល។ ទឹកប្រាក់នៃការចំ ណាយ សម្រាប់ការកសាងនេះ ទទួលបានពីសប្បុរសជន ក្នុងស្រុកនិង ក្រៅស្រុក ពិសេសបានការជួយឧបត្ថម្ភ ពីសប្បុរសជន លោកជា សុផារ៉ា ដោយលោកបានចំំំណាយថវិកា ចំនួន ២៧០០ ដុល្លារ សម្រាប់ទិញដី ។ ក្រៅពីនេះ គឺជាថវិការរបស់សប្បុរសជនម៉ាឡេស៊ី និងមួយផ្នែកទៀត ជាការចូលរួមថវិកា បដិភាគរបស់ប្រជាពលរដ្ឋនៅក្នុងភូមិ។
លោក អូស្មាន ហាស្សាន់ ក៍បានកោត សរសើរដល់សប្បុរសជនថា សមិទ្ធផលនេះជាមហាឱកាសសម្រាប់ប្រជាពលរដ្ឋទូទៅ ចារក្នុងប្រវត្តិសាស្ត្រ គឺសម័យតេជោ ក្រោមការ ដឹកនាំរបស់ សម្តេចតេជោ ប្រទេសជាតិ អភិវឌ្ឍន៍ គ្រប់វិស័យ ប្រជាពលរដ្ឋមានសុខសន្តិភាព សេរីភាព។ ជាក់ស្តែង ជាគោលនយោបាយលុបបំបាត់ ភាពក្រីក្ររបស់រាជ រដ្ឋាភិបាល ក្នុងខេត្តត្បូងឃ្មុំយើង មានជីវភាពធូរធារប្រសើរឡើង ពីមួយថ្ងៃទៅមួយថ្ងៃ។
លោកបន្តថា នៅថ្ងៃនេះទៀតសោត សហគមន៍ភូមិជៀសទី២ បានទទួលសមិទ្ធផលថ្មីមួយទៀត ដែលសម្ពោធដាក់ឱ្យប្រើប្រាស់នៅថ្ងៃនេះ ដោយសារតែប្រទេសជាតិ មានសុខសន្តិភាព ម្ចាស់ជំនួយនានា បានទុកចិត្តលើរាជរដ្ឋាភិបាល ទើបអំណោយគ្រប់បែបយ៉ាង ត្រូវបាននាំមកជូនដល់សហគមន៍យើង ចូលរួមលុបបំបាត់ភាពក្រីក្រ លើកកំពស់វិស័យសាសនា និង វិស័យអប់រំ ក៏ដូចជាវិស័យនានា ផ្សេងទៀតផងដែរ។
ក្នុងឱកាសនេះដែរ លោកអូស្មាន ហាស្សាន់ ក៍បាននាំយកនូវអំណោយដ៏ថ្លៃថ្លារបស់ សម្តេចតេជោ និង សម្តេចកិត្តិព្រឹទ្ឋបណ្ឌិតរួមមាន ឧបត្ថម្ភ វិហារ២លានរៀល យុវជនកាកបាទ ក្រហម ៥០នាក់ យុវជនកាយរិទ្ធ៥០នាក់ យុវជន ស.ស.យ.ក ៥០នាក់ យុវជនសមាគមសម្ព័ន្ធយុវជនមុស្លិមកម្ពុជា (សយមក) ១៦នាក់ ម្នាក់ៗថវិកា ១ម៉ឺនរៀល គ្រូបង្រៀនឥស្លាម ២នាក់ ម្នាក់ៗ សារុង១ ថវិកា ២ម៉ឺនរៀល សិស្សា នុសិស្ស ៨៣នាក់ ម្នាក់ៗទទួលបាន សៀវភៅ២ក្បាល ប៊ិច១ដើម ថវិកា ២ពាន់រៀល និង ចាស់ជរា ស្ត្រីមេម៉ាយ ជនពិការ ៤២នាក់ ក្នុងម្នាក់ សារុង១ និង ថវិកា២ម៉ឺនរៀល៕
ដោយ៖ សំរិត
