សម្តេចតេជោ ហ៊ុន សែនបានមានប្រសាសន៍ក្នុងFacebookថា ប្រជាពលរដ្ឋរួមទាំងភ្ញៀវទេសចរណ៌ជាតិ និងអន្តរជាតិដែលធ្វើដំណើរឆ្លងកាត់ផ្លូវជាតិលេខ៤ ជាពិសេសឆ្លងកាត់កន្លែង “លោកយាយម៉ៅ” នៅពេជ្រនិលនេះ តែងតែចុះបន់ស្រន់សុំសេចក្តីសុខសប្បាយ ក្នុងការធ្វើដំណើរទៅមក និងសុំលាភសុំសំណាង។

លោកយាយម៉ៅ ត្រូវបានចាត់ទុកថាជាទីសក្ការៈដែលពលរដ្ឋមានជំនឿជាយូរយារណាស់មកហើយ ចំពោះបារមីលោកយាយដែលតែងតែថែរក្សាការពារពលរដ្ឋ និងអ្នកធ្វើដំណើរឆ្លងកាត់ទីនេះទៅតាមបណ្តាខេត្តនានា ជាពិសេសអ្នកធ្វើដំណើរឆ្ពោះទៅកាន់តំបន់ឆ្នេរសមុទ្រភាគខាងត្បូងនៃប្រទេសកម្ពុជា។ ទីសក្ការៈបូជានេះមិនត្រឹមតែជាកន្លែងគោរពបន់ស្រន់របស់អ្នកដំណើរនិងទេសចរប៉ុណ្ណោះទេ តែថែមទាំងជាកន្លែងផ្តល់ការងារ និងមុខរបរទទួលទានមួយចំនួនដល់ប្រជាពលរដ្ឋរស់នៅទីនេះអោយមានជីវភាពរស់នៅល្អប្រសើរទៀតផង ចាប់តាំងពីប្រទេសជាតិយើងមានសុខសន្តិភាពមក។

សូមជនរួមជាតិធ្វើដំណើរឆ្លងកាត់ទីនេះមានសុខសុវត្ថិភាពទាំងអស់គ្នា ហើយសូមបើកបរដោយប្រុងប្រយ័ត្នគ្រប់ពេលជានិច្ច៕

ដោយ៖ សុវណ្ណារ៉ា