ភ្នំពេញ: ខួបនៃច្បាប់ ADA គឺជាការរំលឹកមួយថា នៅមានការងារច្រើនទៀតដែលត្រូវធ្វើ ដើម្បីធានាសិទ្ធិរបស់ជនពិការនៅកម្ពុជា និងនៅជុំវិញពិភពលោក។ នៅក្នុងអត្ថបទជាបន្តរបស់ខ្ញុំដែលផ្តោតលើអង្គការសង្គមស៊ីវិល ខ្ញុំចង់ទាញការយកចិត្តទុកដាក់របស់លោកអ្នកចំពោះអង្គការអតីតយុទ្ធជនអន្តរជាតិនៅកម្ពុជា (VIC) ដែលការងារសំខាន់របស់អង្គការនេះកំពុងតែកែលំអជីវិតរស់នៅរបស់ជនពិការ នៅកម្ពុជា›។
លោក William E. Todd ឯកអគ្គរដ្ឋទូតសហដ្ឋអាមេរិក ប្រចាំព្រះរាជាណាចក្រកម្ពុជា បានថ្លែងនៅក្នុង Blogs របស់លោកថា ‹នៅក្នុងខ្ទង់សារព័ត៌មានចុងក្រោយរបស់ខ្ញុំ ខ្ញុំបានសរសេរអំពីសារៈសំខាន់នៃសិទ្ធិរបស់ជនពិការនៅកម្ពុជា និងការដែលឆ្នាំនេះគឺជាខួបលើកទី២៥ នៃច្បាប់ស្តីពីជនពិការអាមេរិក (ADA) នៅក្នុងសហរដ្ឋអាមេរិក។
លោក William E. Todd បន្តថា ‹នៅកម្ពុជាមានជនពិការចំនួនប្រមាណ ៧ សែននាក់ ដែលពិការដោយសារគ្រាប់មីន គ្រោះថ្នាក់ម៉ូតូ និងរថយន្ត ការពិការពីកំណើត និងបុព្វហេតុផ្សេងទៀត។ ខ្ញុំបានដឹងថា ក្រៅពីការរើសអើង ជនពិការប្រឈមនឹងឧបសគ្គផ្នែកសេដ្ឋកិច្ច សង្គម និងរូបវ័ន្ត ដែលរារាំងពួកគេមិនអោយទទួលបានការអប់រំ សេវាថែទាំសុខភាព ការស្តារនិតិសម្បទារ ហើយនិងសេវានានាដទៃទៀតប្រកបដោយគុណភាព សមស្រប និងក្នុងតំលៃដែលអាចទទួលយកបាន។ អ្នកទាំងនេះជាច្រើនត្រូវការការស្តារកាយសម្បទារ អវៈយវៈសិប្បនិមិត្ត និងឈើច្រត់ ហើយនិងសេវាចាំបាច់ដទៃទៀត ដើម្បីជំនះលើបញ្ហាប្រឈមនៅក្នុងជីវិតរបស់គេ ដែលជាការធ្វើអោយគេអាចសំរេចសក្តានុពល ហើយចូលរួមបានពេញលេញ ក្នុងសង្គមបាន›។
លោកឯកអគ្គរដ្ឋទូតបន្ថែមថា ‹ហេតុដូច្នេះហើយបានជាខ្ញុំជឿថា ការងាររបស់អង្គការ VIC មានសារៈសំខាន់ណាស់។ តាំងពីបើកគ្លីនិកគៀនឃ្លាំង នៅឆ្នាំ១៩៩២ មក អង្គការ VIC បានស្តារលទ្ធភាពពលកម្មដល់ជនពិការ ដើម្បីជួយគេក្នុងការបំពេញសេចក្តីត្រូវការប្រចាំថ្ងៃជាមូលដ្ឋានរបស់គេ។ អង្គការនេះថែមទាំងបានបើកមជ្ឈមណ្ឌល នៅខេត្តព្រៃវែង និងក្រចេះ ដើម្បីពង្រីកសេវារបស់គេដល់តំបន់ដទៃទៀត នៅក្នុងប្រទេស។ គិតមកដល់ពេលនេះ អង្គការ VIC បានផ្តល់សេវាស្តារលទ្ធភាពពលកម្មដល់មនុស្សរាប់ម៉ឺននាក់នៅកម្ពុជា ហើយជាអ្នកផ្គត់ផ្គង់មួយក្នុងចំណោមអ្នកផ្គត់ផ្គង់សំខាន់នៃអវៈយវៈសិប្បនិមិត្ត និងគ្រឿងប្រដាប់អប នៅក្នុងប្រទេស›។
លោកទូតបញ្ជាក់ទៀតថា ‹ខ្ញុំមានសេចក្តីរីករាយដោយរដ្ឋាភិបាលសហរដ្ឋអាមេរិក តាមរយៈទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្តរជាតិ (USAID) នៅក្នុងពេលថ្មីៗនេះបានផ្តើមកម្មវិធីថ្មីមួយ ស្តីពីការស្តារនិតិសម្បទារ និងការផ្តល់អវៈយវៈសិប្បនិមិត្តដល់ជនពិការ នៅកម្ពុជា។ កម្មវិធីនេះនឹងធ្វើអោយអង្គការ VIC អាចបន្តផ្តល់ការស្តារនិតិសម្បទារ និងផ្តល់អវៈយវៈសិប្បនិមិត្តដល់ជនពិការ។ ដោយធ្វើការសំរបសំរួលជាមួយនឹងក្រសួងសង្គមកិច្ច អតីតយុទ្ធជន និងស្តារយុវនិតិសម្បទារ អង្គការ VIC កំពុងជួយរដ្ឋាភិបាលកម្ពុជាក្នុងពេលដែលរដ្ឋាភិបាលកម្ពុជាកំពុងទទួលយកការទទួលខុសត្រូវច្រើនថែមទៀត នៅក្នុងការផ្តល់សេវាដ៏សំខាន់នេះដល់ពលរដ្ឋរបស់ខ្លួន។ កម្មវិធីនេះដែលគាំទ្រថវិកាដោយទីភ្នាក់ងារ USAID នឹងជួយធានាអន្តរកាលដោយរលូន ក្នុងពេលដែលរដ្ឋាភិបាលកម្ពុជាចាប់ទទួលបន្ទុកលើមជ្ឈមណ្ឌលស្តារលទ្ធភាពពលកម្មទាំងបីរបស់អង្គការ VIC នៅត្រឹមដំណាច់ឆ្នាំ២០១៦។ ខ្ញុំសូមសរសើររាជរដ្ឋាភិបាលកម្ពុជា ដែលបានដាក់ចុះ និងអនុវត្តច្បាប់ បទបញ្ជា និងគោលនយោបាយមួយចំនួន ដើម្បីដោះស្រាយបញ្ហាប្រឈមសំរាប់ជនពិការ នៅកម្ពុជា។ សហរដ្ឋអាមេរិកមានការតាំងចិត្តក្នុងការធ្វើការជាមួយរដ្ឋាភិបាលកម្ពុជា បុគ្គល និងអង្គការនានា ដូចជាអង្គការ VIC ដើម្បីជួយដល់ជនពិការ។ តាមរយៈការធ្វើការជាមួយគ្នា ខ្ញុំជឿថា យើងអាចធ្វើអោយមានភាពជឿនលឿន ដោយធានាអោយមានឱកាសស្មើគ្នាក្នុងការអប់រំ ការងារ និងជីវិតរស់នៅរាល់ថ្ងៃសំរាប់ជនពិការនៅកម្ពុជា›៕
ស ដារ៉ា
