ភ្នំពេញ៖ នៅវេលាម៉ោង៩:០០នាទីព្រឹកថ្ងៃទី២៩ ខែកុម្ភៈ ឆ្នាំ២០១៦ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា បានអនុញ្ញាតឲ្យលោក ហូអាន ដេ ហេហ្សូស ហីដាល់ហ្គូ ហ្គាតូ ប៉េ រ៉េស (HE. Mr. Juan de Jesús Hidalgo-Gato Péres )ឯកអគ្គរដ្ឋទូតថ្មី នៃសាធារណរដ្ឋគុយបា ប្រចំាព្រះរាជាណាចក្រកម្ពុជា ជួបសម្តែងការគួរសម នៅវិមានរដ្ឋសភា។
សម្តេចអគ្គមហាពញាចក្រី ប្រធានរដ្ឋសភា បានស្វាគមន៍ចំពោះ លោកឯកអគ្គរដ្ឋទូត ដែលបានឆ្លៀតឱកាសមកសម្តែងការគួរសម ខណៈដែលឯកឧត្តម ត្រូវបានរដ្ឋាភិបាល នៃសាធារណរដ្ឋគុយបា ផ្តល់សេចក្តីទុកចិត្តតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាព ប្រចាំព្រះរាជាណាចក្រកម្ពុជា។
លោក ឯកអគ្គរដ្ឋទូត ក៏បានថ្លែងអំណរគុណដល់សម្តេចប្រធាន ដែលបានផ្តល់កិត្តិយសដល់ឯកឧត្តម បានចូលជួបសម្តែងការគួរសម ហើយក៏បានប្តេជ្ញាបន្តធ្វើការពង្រីងនិងពង្រីកទំនាក់ទំនង កម្ពុជា-គុយបា ឲ្យកាន់តែប្រសើរឡើងថែមទៀត។ សាធារណរដ្ឋគុយបា ក៏បានអរគុណដល់រដ្ឋសភា និងរាជរដ្ឋាភិបាលកម្ពុជា ដែលតែងតែជួយគាំទ្រគុយបា នៅគ្រប់កាលៈទេសៈ។
ជាការឆ្លើយតប សម្តេចប្រធាន សូមអរគុណសាធារណរដ្ឋគុយបា ដែលបានជួយបណ្តុះបណ្តាលធនធានមនុស្ស ដល់កម្ពុជា តាមរយៈការផ្តល់អាហារូបករណ៍ ដល់និស្សិតកម្ពុជា នូវជំនាញ ពីគុយបា ដូចជាវិស័យ កសិកម្ម វេជ្ជសាស្រ្ត និងវិស័យផ្សេងៗទៀត៕
ដោយ៖ សុខ ខេមរា