អន្តរជាតិ៖ បេីយោងតាមលិខិតចំហមួយរបស់អង្គការក្រៅរដ្ឋាភិបាលចំនួន១៤០ មកពីប្រទេសចំនួន៣១ កាលពីថ្ងៃទី២៤ ខែកុម្ភៈ ឆ្នាំ២០២១ បានអំពាវនាវឲ្យក្រុមប្រឹក្សាសន្តិសុខរបស់អង្គការសហប្រជាជាតិ (UNSC) ដាក់ទណ្ឌកម្មលើការលក់អាវុធឲ្យមីយ៉ាន់ម៉ា។ ប៉ុន្តែចំពោះការស្នើនេះ ទំនងពិបាកទៅរួចណាស់ ខណៈដែលសមាជិកក្រុមប្រឹក្សាសន្តិសុខចំនួន៣ គឺជាដៃគូលក់អាវុធដ៏សំខាន់ឱ្យមីយ៉ាន់ម៉ាទៅហើយ។
ជាក់ស្ដែងនៅក្នុងលិខិតចំហមួយដែលផ្ញើទៅក្រុមប្រឹក្សាសន្តិសុខ បានគូសបញ្ជាក់ថា៖«ក្រុមប្រឹក្សាសន្តិសុខអង្គការសហប្រជាជាតិ គួរតែប្រញាប់ដាក់ទណ្ឌកម្មហាមឃាត់ការលក់អាវុធសម្រាប់មីយ៉ាន់ម៉ា»។ អង្គការក្រៅរដ្ឋាភិបាលចំនួន១៤០ មកពី៣១ប្រទេស បានបញ្ជាក់បែបនេះ នៅក្នុងលិខិតចំហមួយដែលផ្ញើទៅក្រុមប្រឹក្សាសន្តិសុខ។
បើតាមអង្គការក្រៅរដ្ឋាភិបាល ការហាមឃាត់លក់អាវុធឱ្យមីយ៉ាន់ម៉ា គឺដើម្បីប្រឆាំងនឹងរដ្ឋប្រហារយោធា និងទបស្កាត់របបសឹកមិនឱ្យប្រើប្រាស់សកម្មភាពរំលោភបំពានថែមទៀត។ ខណៈលិខិតដដែលនេះ ក៏បានអំពាវនាវឱ្យដៃគូសំខាន់ៗរបស់មីយ៉ាន់ម៉ាឈប់លក់អាវុធ គ្រាប់កាំភ្លើង និងអាវុធផ្សេងទៀតឱ្យរដ្ឋាភិបាលផងដែរ។ ដៃគូសំខាន់ៗរបស់មីយ៉ាន់ម៉ាមានដូចជា៖ ចិន ឥណ្ឌា រុស្ស៊ី អ៊ីស្ត្រាអែល កូរ៉េខាងជើង ហ្វីលីពីន និងអ៊ុយក្រែន។
យ៉ាងណាមិញ ជុំវិញបញ្ហាទណ្ឌកម្មអាវុធលើមីយ៉ាន់ម៉ានេះដែរ ទំនងជាមិនអាចកើតឡើងឡើយ ព្រោះក្នុងចំណោមដៃគូទាំងនោះ មានប្រទេសចំនួន៣ ជាសមាជិកក្រុមប្រឹក្សាសន្តិសុខ។ ប្រទេសទាំងនោះមានដូចជា៖ ចិន រុស្ស៊ី និងឥណ្ឌាដែលជាសមាជិកមិនអចិន្ត្រៃយ៍។ ចិន និងរុស្ស៊ីអាចប្រើសិទ្ធិវេតូរបស់ខ្លួនលើសេចក្តីសម្រេចរបស់ក្រុមប្រឹក្សាសន្តិសុខ បានគ្រប់ពេល។
មិនតែប៉ុណ្ណោះ អង្គការក្រៅរដ្ឋាភិបាលខាងលើ ក៏បានអំពាវនាវឱ្យក្រុមប្រឹក្សាសន្តិសុខ ដាក់ទណ្ឌកម្មលើបុគ្គលជាក់លាក់ ការហាមឃាត់លើការធ្វើដំណើរជាសកល និងបង្កកទ្រព្យសម្បត្តិលើមេដឹកនាំយោធា និងក្រុមហ៊ុនដែលមានទាក់ទិនជាមួយយោធាផងដែរ។
ដោយឡែកនៅក្នុងថ្ងៃទី២៥ ខែកុម្ភៈ ឆ្នាំ២០២១ បណ្តាញសង្គម Facebook ឯណោះវិញ ក្រុមហ៊ុនលំដាប់ពិភពលោកមួយនេះ បានប្រកាសបិទគណនី Facebook និងពាណិជ្ជកម្មទាំងអស់ ដែលពាក់ព័ន្ធក្រុមយោធា និងក្រុមហ៊ុនគ្រប់គ្រងដោយក្រុមយោធា។ ចំណាត់ការនេះ ធ្វើឡើងដោយសារក្រុមហ៊ុន ចាត់ទុកស្ថានការណ៍នៅមីយ៉ាន់ម៉ាក្រោយរដ្ឋប្រហារ ជាស្ថានភាពអាសន្ន ព្រោះតែការបង្ក្រាបបាតុកររហូតដល់មានបាត់បង់ជីវិត។ ដូចគ្នានឹង Facebook បណ្តាញសង្គម Instagram ក៏ហាមឃាត់បែបនេះដែរ៕ដោយ៖ស តារា
រូបភាព៖ AFP
