ខេត្តត្បូងឃ្មុំ៖ បុរសម្នាក់បានលបឡើងផ្ទះកូនស្រីគេរៀបរំលោភ តែមិនទាន់បានសម្រេចផង ស្រាប់តែឮសូរសំឡេង ដឹងដល់ម្ដាយនារីរងគ្រោះ និងគ្រួសារ រួចជនសង្ស័យក៏លោតពីលើផ្ទះគេចខ្លួនបាត់។
ករណីនេះកើតឡើងនៅយប់ថ្ងៃទី២៨ ខែកុម្ភៈ ឆ្នាំ២០១៦ នៅចំណុច ផ្ទះនារីរងគ្រោះឈ្មោះអ.ឡ.ហ អាយុ១៦ឆ្នាំ នៅភូមិឆ្លូង១ ឃុំកំពាន់ ស្រុកមេមត់ ខេត្តត្បូងឃ្មុំ បង្កឡើងដោយជនសង្ស័យ ឈ្មោះ ម៉ាសឺត អាមាត ភេទ ប្រុស អាយុ២០ឆ្នាំ រស់នៅភូមិព្រែកពួយ ឃុំកំពាន់ ស្រុកមេមត់។
ប្រភពព័ត៌មានបានឲ្យដឹងថា មុនពេលកើតហេតុ នារីរងគ្រោះ និងជនសង្ស័យមានទំនាក់ទំនងស្នេហាជាមួយគ្នា ដោយនៅយប់ថ្ងៃកើតហេតុនោះ ពួកគេបាននិយាយទូរស័ព្ទជាមួយគ្នា។ ក្រោយពីនិយាយទូរស័ព្ទរួច ជនសង្ស័យក៏បានលបឡើងទៅលើផ្ទះនារីរងគ្រោះដើម្បីធ្វើសកម្មភាពរំលោភ ប៉ុន្តែមិនទាន់បានរំលោភផង ក៏ឮសំឡេងប្រាវ ធ្វើឲ្យម្ដាយនារីរងគ្រោះ និងក្រុមគ្រួសារដឹងហើយពេល ជនសង្ស័យក៏លោតពីលើផ្ទះរត់គេចខ្លួន។ ភ្លាមៗក្រុមគ្រួសារនារីរងគ្រោះក៏ដេញតាមឃើញបុរសម្នាក់នៅភូមិ ជាមួយគ្នានោះ ស្មានតែជនសង្ស័យ ក៏ឃាត់ខ្លួនប្រគល់ឲ្យសមត្ថកិច្ច។ ពេលសមត្ថកិច្ចសួរនាំទើបដឹងថា បុរស ដែលក្រុមគ្រួសារនារីរងគ្រោះឃាត់ខ្លួននេះមិនមែនជាជនសង្ស័យឡើយ គ្រាន់តែមានឈ្មោះស្រដៀងគ្នាគឺឈ្មោះម៉ាហ៊ាត អាមាត។
ក្រោយមកសមត្ថកិច្ចក៏ធ្វើការដោះលែងមនុស្សវិញ។ រីឯជនសង្ស័យបានគេចខ្លួនបាត់ស្រមោល ដោយសមត្ថកិច្ចមិនទាន់ចាប់ខ្លួនបានឡើយ៕
ដោយ៖ វិបុល
