អន្តរជាតិ៖ បេីតាមព្រមានពីអ្នកជំនាញផ្នែកសង្គ្រោះបន្ទាន់របស់អង្គការសុខភាពពិភពលោក (WHO) លោក ម៉ៃខឺល រីយ៉ាន (Mike Ryan) បានថ្លែងប្រាប់សន្និសីទកាសែតមួយតាមប្រព័ទ្ធអ៉ីនធើណេត នៅថ្ងៃសុក្រ ទី០៥ ខែមីនា ឆ្នាំ២០២១ថា៖ ប្រទេសនានា មិនត្រូវបន្ធូរបន្ថយកិច្ចខិតខំប្រឹងប្រែង ក្នុងការប្រយុទ្ធប្រឆាំងនឹង COVID-19 នោះឡើយ។ បើទោះបីជាមានការមកដល់ នៃវ៉ាក់សាំងបង្ការជំងឺនេះក៏ដោយ ដោយលើកឡើងពីការព្រួយបារម្ភថា ការឆ្លងរាតត្បាតនៃជំងឺនេះនៅប្រទេសប្រេស៉ីល អាចនឹងបង្កឲ្យមានការឆ្លងរីករាលដាល ដល់ប្រទេសដទៃៗទៀតបាន ប្រសិនបើប្រទេសទាំងនោះ មិនមានការប្រុងប្រយ័ត្នខ្ពស់។
មន្រ្តីជំនាញផ្នែកសង្គ្រោះបន្ទាន់របស់ WHO បានគូសបញ្ជាក់បន្ថែមថា៖ «យើងប្រហែលជាគិតថា បានឆ្លងកាត់បញ្ហានេះរួចទៅហើយ ប៉ុន្តែវាមិនមែនដូចអ្វីដែលយើងបានគិតទេ។ ប្រទេសនានា នឹងវិលត្រឡប់ទៅប្រឈមនឹងការឆ្លងរីករាលដាលរលកទីបី និងទីបួននៃជំងឺ COVID-19 នេះវិញ ប្រសិនបើយើងមិនមានការប្រុងប្រយ័ត្ន»។ នេះបើតាមការចេញផ្សាយ ដោយសារព័ត៌មាន CNA នៅរសៀលថ្ងៃសៅរ៍ ទី០៦ ខែមីនា ឆ្នាំ២០២១។
បន្ថែមពីនេះ លោក ម៉ៃខឺល រីយ៉ាន បន្តថា «ឥឡូវនេះមិនមែនជាពេលវេលា សម្រាប់ប្រទេសប្រេស៊ីល ឬប្រទេសដទៃផ្សេងទៀត ត្រូវបន្ធូរបន្ធយកិច្ចខំប្រឹងប្រែង ក្នុងការប្រយុទ្ធប្រឆាំងនឹងជំងឺ COVID-19 នោះឡើយ ហើយការមកដល់នៃវ៉ាក់សាំង គឺជាពេលវេលានៃក្តីសង្ឃឹមដ៏អស្ចារ្យបំផុត ប៉ុន្តែវាក៏ជាឱកាសមួយដែលធ្វើឲ្យយើង បាត់បង់ការផ្តោតអារម្មណ៍ទៅលើកិច្ចខំប្រឹងប្រែង ក្នុងការប្រយុទ្ធប្រឆាំងនឹងជំងឺនេះផងដែរ»។
ដោយឡែកបេីតាមរាយការណ៍ នៅក្នុងប្រទេសប្រេស៊ីល បានបញ្ជាក់នៅសប្តាហ៍នេះថា៖ អ្នកឆ្លងជំងឺ COVID-19 ច្រើនជាង ៧០,០០០នាក់ និងអ្នកស្លាប់ច្រើនជាង ១,៦០០នាក់។ រហូតមកទល់ពេលនេះ ប្រទេសប្រេស៊ីល បានកត់ត្រានូវករណីឆ្លងជំងឺ COVID-19 សរុបនៅទូទាំងប្រទេសជាង ១០.៨៦ករណីហើយ ក្នុងនោះមានអ្នកស្លាប់ជាង ២៦០,០០០នាក់។
ដូច្នេះប្រសិនបើប្រទេសប្រើស៉ីល និងប្រទេសនានា មិនយកចិត្តទុកដាក់ ចំពោះកិច្ចខំប្រឹងកប្រែងក្នុងប្រយុទ្ធប្រឆាំង នឹងការឆ្លងរីករាលដាលនៃជំងឺនេះទេ វានឹងបន្តការឆ្លងរីករាលដាល ដល់ប្រទេសជិតខាងដទៃទៀតមិនខាន៕ដោយ៖ស តារា
លោក ម៉ៃខឺល រីយ៉ាន (Mike Ryan)អ្នកជំនាញផ្នែកសង្គ្រោះបន្ទាន់របស់អង្គការសុខភាពពិភពលោក (WHO)
