ក្រុមបិសាចក្រហម Manchester United បានបញ្ចប់ការមិនដែលចាញ់របស់ក្រុមមេឃខៀវ Manchester City កាលពីរំលងអធ្រាត្រឈានចូលថ្ងៃទី៨ ខែមីនានេះ។ ការទទួលបានជ័យជម្នះរបស់ក្រុមបិសាចក្រហម Man United ធ្វើឲ្យក្រុមមួយនេះទទួលបាន៣ពិន្ទុបន្តឈរលេខរៀងទី២បណ្តោះអាសន្នក្នុងលីគកំពូលអង់គ្លេស។

យោងតាមការចេញផ្សាយរបស់ BBC Sport បានបង្ហាញថា ក្រុមបិសាចក្រហមបានគ្រប់គ្រង​បាល់តែ៣៤ភាគរយប៉ុណ្ណោះ ខណៈដែលក្រុមមេឃខៀវ Man City បានគ្រប់គ្រងបាល់រហូតដល់៦៦ភាគរយ និងមានឱកាសស៊ុតច្រើនជាងក្រុម Man United។ ប៉ុន្តែក្នុងការប្រកួតបានតែ២នាទីកីឡាករក្រុម Man City ធ្វើឲ្យមានកំហុសក្នុងតំបន់ពិន័យ អាជ្ញាកណ្តាលឲ្យបានពិន័យឲ្យបាល់ប៉េណាល់ទីក្រុម Man United ដែលជាការស៊ុតបាល់ពិន័យដោយខ្សែបម្រើប្រយុទ្ធ Bruno Fernandes ។

ការនាំមុខ១គ្រាប់របស់ក្រុម Man United ធ្វើឲ្យក្រុមនេះបន្តលទ្ធផលរហូតដល់ចប់ការប្រកួតក្នុងតង់ទី១។ ចូលដល់ការប្រកួតតង់ទី២ ក្រុមមេឃខៀវនៅតែមានឱកាសច្រើនក្នុងការគ្រប់គ្រងបាល់ ហើយមានឱកាសស៊ុតចំគោលដៅជាច្រើនលើក ប៉ុន្តែត្រូវអ្នកចាំទីក្រុម Man United សង្គ្រោះបានរហូត។ ចូលដល់នាទីទី៥០ ខ្សែការពារស្លាបឆ្នើម Shaw មានឱកាសស៊ុតបាល់ចូលក្រុម Man City ១គ្រាប់ទៀត ដែលជាជ័យជម្នះយ៉ាងអស្ចារ្យក្នុងទឹកដីក្រុមម្ចាស់ផ្ទះ Man City ។

លទ្ធផលនេះបានបន្តរហូតចប់ការប្រកួត ដោយក្រុមបិសាចក្រហម Man United ឈ្នះក្រុមម្ចាស់ផ្ទះ Man City ២ទល់០។ ជ័យជម្នះនេះធ្វើឲ្យក្រុម Man United ទទួលបាន៣ពិន្ទុ បន្តឈរលេខ២បណ្តោះអាសន្នមាន៥៤ពិន្ទុ ខណៈដែលក្រុម Man City បន្តឈរលេខ១មាន៦៥ពិន្ទុដដែលក្នុង២៨ប្រកួតដូចគ្នា។

អ្នកចាត់ការទូទៅក្រុមបិសាចក្រហម លោក Ole Gunnar Solskjaer បាននិយាយថា ក្រុមបិសាចក្រហម Manchester United មិនគិតពីការដេញតាមក្រុម Manchester City ឡើយបើទោះបីជាការនាំជ័យជម្នះចំនួន២១លើកជាប់ៗគ្នារបស់ក្រុមកំពូលតារាង Premier League ក៏ដោយ។

ក្រុមរបស់លោក Pep Guardiola នៅតែនាំមុខ១១ពិន្ទុនៅលើកំពូលតារាងប៉ុន្តែលក្ខណៈដែលក្រុមបិសាចក្រហមបានបំបាក់ក្រុម Man City ដែលមិនធ្លាប់មានពីមុនមក និងបង្កើនឱកាសក្រុមកំពូលទាំង៤ របស់ពួកគេនឹងក្លាយជាការជំរុញទំនុកចិត្តយ៉ាងខ្លាំងដល់លោក Solskjaer និងកីឡាកររបស់គាត់។

ក្រុមរបស់លោក Solskjaer ដែលមិនបានស៊ុតបាល់បញ្ចូលទីនៅក្នុងការប្រកួត៣លើកជាប់គ្នា បានវិលត្រឡប់មកចំណាត់ថ្នាក់លេខ២ ដោយឈរនៅពីលើក្រុម Leicester City ក្នុងការប្រជែងដ៏តឹងតែងដើម្បីដណ្តើមយកចំណាត់ថ្នាក់ Top 4 ៕

 

ដោយ៖ ភារៈ