ខេត្តស្វាយរៀង: យ៉ាងហោចណាស់ក៏មានជនជាតិចិន១៣នាក់បានរងរបួសដោយសារករណីគ្រោះថ្នាក់ចរាចរណ៍បើករថយន្តប្រើប្រាស់ល្បឿនលឿន ខ្វះការប្រុងប្រយ័ត្នបណ្ដាលឱ្យរេចង្កូតក្រឡាប់បង្កការភ្ញាក់ផ្អើលដល់អ្នកភូមិទាំងព្រឹកព្រលឹម។
ហេតុការណ៍នេះបានកើតឡើងកាលពីវេលាម៉ោងប្រមាណ៥ព្រឹកថ្ងៃទី១២ មីនា ឆ្នាំ២០២១នេះ លើផ្លូវជាតិលេខ១ត្រង់ចន្លោះគីឡូម៉ែត្រ ១៣១និង១៣២ ស្ថិតក្នុងភូមិ ស្វាយតឿ សង្កាត់ស្វាយតឿ ក្រុងស្វាយរៀង ។
តាមអ្នកភូមិបានឱ្យដឹងថា មុនកើតហេតុមានរថយន្តមួយគ្រឿងម៉ាក ឡិចស៊ីស RX៣០០ ពណ៌ទឹកមាស ពាក់ស្លាកលេខ ភ្នំពេញ ២G-៩៥២១ដោយមានមនុស្សជិះក្នុង រថយន្តជាច្រើននាក់ដោយធ្វើដំណើរក្នុងទិសដៅពីលិចទៅកើតសង្ស័យឆ្ពោះទៅក្រុងបាវិតលើផ្លូវជាតិលេខ១
ដោយប្រីប្រាស់ល្បឿនលឿន ខ្វះការប្រុងប្រយ័ត្នបណ្ដាលឱ្យរេចង្កូតក្រឡាប់បង្កការភ្ញាក់ផ្អើលដល់អ្នកភូមិទាំងព្រឹកព្រលឹមតែម្ដង។
ក្រោយកើតហេតុអ្នកបើករថយន្តបានរត់គេចខ្លួនបាត់ភ្លាមៗដោយសមត្ថកិច្ចបានមកធ្វើអន្តរាគមន៍ជួយសង្គ្រោះដល់ជនជាតិចិនទាំង១៣នាក់នោះបញ្ជូនទៅព្យាបាលនិងធ្វើចត្តាឡីស័កនៅផ្ទះសំណាក់គ្រូបង្រៀនក្រុងស្វាយរៀងផងដែរ៕
យឹម សុថាន
